सडक खाली गर्न मिटरब्याज पीडितमाथि बल प्रयोग निरन्तर

काठमाडौं- मिटरब्याज पीडितमाथि प्रहरीले मंगलबार पनि धरकपड गरेको छ। नेपाल भ्रमणमा रहेका जनवादी गणतन्त्र चीनको राष्ट्रिय जनकांग्रेस स्थायी समितिका अध्यक्ष (सभामुख) ली चान्सु नेतृत्वको टोली काठमाडौंमा रहेका बेला सडक खाली गरिरहेको प्रहरीले पीडितहरूमाथि बल प्रयोग गरेको हो। 

सुदखोरबाट प्रताडित मिटरब्याज पीडितहरू ४२ दिनदेखि न्यायका लागि काठमाडौंको माइतीघरमा आन्दोलन गरिरहेका छन्। दिनभर माइतीघरमा प्रदर्शन गरी उनीहरू कीर्तिपुरस्थित खुला मैदानमा पाल टाँगेर रात कटाइरहेका छन्। 

यसैक्रममा सोमबार लीको भ्रमणलाई व्यवस्थित पार्न प्रहरी बिहानै उनीहरू बसेकै ठाउँमा गई रोक्न खोजेको थियो। प्रहरीले पीडितलाई लिन आएको गाडी रोकेपछि उनीहरू हिँडेरै प्रदर्शन गर्न माइतीघर आउन थालेपछि प्रहरी कीर्तिपुर गेटनजिक बल प्रयोग गरी केहीलाई नियन्त्रणमा लिएको थियो। 

मंगलबार पनि पीडितहरू प्रदर्शनका लागि माइतीघर पुगेका थिए। माइतीघर पुगेर शान्तिपूर्ण धर्ना दिने क्रममा प्रहरीले आफूमाथि आक्रमण गरेको मिटर ब्याज तथा ठगीविरुद्ध किसान–मजदुर संघर्ष समितिका अध्यक्ष रमसुरत गुप्ताले बताए। धर्नामा बसेका ३० जनालाई पक्राउ गरेर प्रहरीले लगेको जानकारी गुप्ताले दिए।