नेपालले पाकिस्तानलाई पठायो राहत सामग्री

काठमाडौं–नेपाल सरकारले बाढीपहिरोको विपद्मा परेको पाकिस्तानलाई राहतस्वरूप २२ टन बढी अत्यावश्यक मानवीय सहायता सामग्री पठाएको छ।

पाकिस्तानमा हालैको बाढीपहिरोजन्य घटनापीडितलाई राहतस्वरुप सहायता सामग्री उपलब्ध गराइएको परराष्ट्र मन्त्रालयले बताएको हो। उक्त सहायता सामग्री राष्ट्रिय ध्वजावाहक नेपाल एयरलाइन्सको वाइडबडीए ३३० जहाजमार्फत पाकिस्तानको कराँची सहर पठाइएको हो ।

विपत्तिमा परेको पाकिस्तान सरकार र जनताको सहयोगस्वरुप २२ टन बढी राहत सामग्री पठाइएको परराष्ट्र मन्त्रालयका प्रवक्ता सेवा लम्सालले बताइन्। राहत सामग्री कराँची पठाउने क्रममा त्रिभुवन अन्तर्राष्ट्रिय विमानस्थलमा आयोजित पत्रकार सम्मेलनमा प्रवक्ता लम्सालले अत्यावश्यक औषधी तथा राहत सामग्री पठाइएको जानकारी दिइन्।

यो सहायता सामग्री नेपाल सरकारले एकैपटक उपलब्ध गराएको हालसम्मकै ठूलो राहत भएको प्रवक्ता लम्सालले बताइन्। नेपालबाट प्रदान गरिने राहत सामग्रीको संयोजन तथा समन्वय परराष्ट्रमन्त्री डा. नारायण खड्काको पहलबाट भएको मन्त्रालयले जनाएको छ।