निलम्बित प्रधानन्यायाधीश चोलेन्द्रले आरोप लगाएकाहरूसँग बयान लिने समितिको निर्णय

काठमाडौं– प्रतिनिधिसभाको महाभियोग सिफारिस समितिले बयानका क्रममा निलम्बित प्रधानन्यायाधीश चोलेन्द्रशमशेर जबराले आरोप लगाएका व्यक्तिलाई पनि सोधपुछका लागि बोलाउने निर्णय गरेको छ। समितिले पाँचौँ दिन मंगलबार जबरासँग अन्तिम बयान लिँदै छ। समितिले उनलाई सोध्न ४३ प्रश्न तयार पारेकामा यसअघिका चार बयानका बेला ३५ प्रश्न सोधिसकेको छ। 

मंगलबार बाँकी ८ प्रश्न सोधेसँगै जबरासँगको बयान सकिनेछ। मंगलबार जबरासँग लिइने बयान सकिनुअघि समितिको बैठक बसेको थियो। बैठकले जबराले संगीन आरोप लगाएका पूर्वन्यायाधीश, नेपाल बार एसोसिएसनका पदाधिकारीलाई बोलाउने निर्णय गरेको समिति सदस्य कांग्रेस सांसद मीन विश्वकर्माले बताए।

यद्यपि समितिले सोधपुछका लागि क–कसलाई बोलाउँछ भन्ने तय भइसकेको छैन। आवश्यकताका आधारमा जबराले आरोप लगाएका नेताहरूलाई पनि सोधपुछका लागि बोलाउन सकिने विश्वकर्माले जानकारी दिए।

जबराले बयानका क्रममा प्रधानमन्त्री शेरबहादुर देउवा, माओवादी अध्यक्ष पुष्पकमल दाहाल ‘प्रचण्ड’,  नेपाल समाजवादी केन्द्रका अध्यक्ष बाबुराम भट्टराई, नेकपा एकीकृत समाजवादीका अध्यक्ष माधवकुमार नेपाललगायतका नेतालाई संगीन आरोप लगाएका छन्। 

यसैगरी उनले तत्कालीन नेपाल बार एसोसिएसनका अध्यक्ष चण्डेश्वर श्रेष्ठ, सचिव लीलामणि पौडेललाई पनि मुछेका छन् भने आफ्नै सहकर्मी न्यायाधीशहरूलाई विभिन्न आरोप लगाएका छन्।