३१ भदौमा सार्वजनिक गरिँदै मतदाता नामावली

काठमाडौं– निर्वाचन आयोगले आगामी ३१ भदौमा मतदाता नामावली सार्वजनिक गर्ने भएको छ। आगामी निर्वाचन प्रयोजनका लागि मतदाता नामावली अध्यावधिक गर्ने काम अन्तिम चरणमा पुगेकाले ३१ भदौमा सार्वजनिक गरिने प्रमुख निर्वाचन आयुक्त दिनेशकुमार थपलियाले बताएका हुन्। 

राष्ट्रिय सभाअन्तर्गतको राष्ट्रिय सरोकार तथा समन्वय समिति बैठकमा थपलियाले यसअघिको प्रतिनिधिसभा र प्रदेशसभा निर्वाचनभन्दा कम खर्च हुने गरी आगामी ४ मंसिरको निर्वाचन सम्पन्न गर्ने तयारीमा आयोग रहेको उनको भनाइ छ।आयोगले आगामी प्रदेशसभा र प्रतिनिधिसभा निर्वाचनमा निर्वाचन आचारसंहिता विपरीतका गतिविधि हुन नदिन सूक्ष्म अनुगमन व्यवस्था गरिरहेको बताएको छ।

प्रमुख निर्वाचन आयुक्त थपलियाले दल र तिनका उम्मेदवारलाई निर्वाचन आचारसंहिता र कानुन विपरीतका गतिविधि हुन नदिन आयोगले आवश्यक नीतिगत र संरचनागत व्यवस्था गरेको धारणा व्यक्त गरे। 

उनले भने, ‘निर्वाचनमा दल र उम्मेदवारबाट हुन सक्ने अपारदर्शी, आचारसंहिता र कानुन विपरीतका खर्च छन्। त्यसको नियमन हाम्रो प्रक्रियाबाट गर्छौं। सूक्ष्म अनुगमन गर्छौं भनेका छौं। केही विवरण लिएकै छौं। दलहरु र उम्मेदवार स्पष्ट भए अनुमगन गर्ने झन्झट हुँदैन थियो।’