मुटुरोग विशेषज्ञ डा कोइरालाले ल्याए विशेष संस्करणको ‘हृदय’

काठमाडौं- डा भगवान कोइरालाको पुस्तक ‘हृदय’को विशेष संस्करणको विमोचन भएको छ। कोइरालाको नेतृत्वमा बन्दै गरेको काठमाडौं इन्स्टिच्युट अफ चाइल्ड हेल्थको निर्माण सहयोगार्थ फाइनप्रिन्टले उनको पुस्तकको विशेष संस्करण ल्याएको हो। सोमबार डा. कोइरालाको सीमित संस्करणको विमोचन गरिएको हो।

सीमित संस्करण एक पटकका लागि २५ सयप्रति मात्र छापिएको हो। जसको अङ्कित मूल्य २५ हजार रुपैयाँ रहेको छ। डा. कोइराला आफैंले ओपन हार्ट सर्जरी गरेका दुई बालबालिकालाई विशेष अतिथि बनाएर पुस्तक विमोचन गरिएको हो।

डा. कोइरालाको पुस्तक हृदयको असोजको १ गतेदेखि पुस्तकको नियमित संस्करण पनि बजारमा उपलब्ध हुने जनाइएको छ। जसको अङ्कित मूल्य काठमाडौंमा ६५० र काठमाडौं बाहिर ५७५ रुपैयाँमा उपलब्ध हुनेछ। विशेष संस्करणको बिक्रीबाट प्राप्त हुने रुपैयाँ प्रकाशकले हस्पिटललाई हस्तान्तरण गर्ने फाइन प्रिन्टका निरज भारीले बताए।

काठमाडौं इन्स्टिच्युट अफ चाइल्ड हेल्थ’ (किओच) हाल काठमाडौंको बूढानीलकण्ठमा निर्माणाधीन अवस्थामा छ। साथै, त्यसको पहिलो प्रदेश शाखाका रूपमा झापाको दमकमा ५० शय्याको बाल अस्पताल निर्माण अन्तिम चरणमा पुगेको छ।

डा कोइरालाले आधारभूत स्वास्थ्य सेवा नपाएकै कारण ज्यान गुमाइरहेका बालबालिकाहरुको उपचारका लागि  विशिष्टीकृत बाल अस्पताल बनाउने योजना बनाएको बताए। किताबमा आफ्नो जीवनमा भोगेका संघर्षका अनुभव, उनले देखेका स्वास्थ्य क्षेत्रका समस्या सुल्झाउने उपाय लगाएत बिषय समेटिएको डा. कोइरालाले बताए।