किशोरी बलात्कारका आरोपी पक्राउ

धनगढी–कञ्चनपुरको बेलडाँडी गाउँपालिका–१ की १६ बर्षीया एक किशोरी बलात्कारमा संलग्न अभियुक्त मध्येका एक पक्राउ परेका छन् । 

बिहीबार राति बलात्कार भएको भनिएको उक्त घट्ना संलग्न मध्येका मानबहादुर बिष्ट पक्राउ परेको कञ्चनपुर प्रहरीले जानकारी दिएको छ । सोही ठाउँका बिष्टलाई प्रहरीले शनिबार पक्राउ गरेको प्रहरीले जानकारी दिएको छ । 

कञ्चनपुर प्रहरी प्रवक्ता डिएसपी कृष्ण ओझाले अन्य अभियुक्तको खोजी कार्य जारी रहेको जानकारी दिए । उनले किशोरीको महाकाली अञ्चल अस्पतालमा स्वास्थ्य परीक्षण गरी अनुसन्धान सुरु भएको बताए । 

किशोरीका बुबाका अनुसार राति करिब साढे १२ बजेतिर सत्यनारायणको कथा सकेर सबै खाना खाइरहेको बेला घर र छरछिमेकका स–साना बालबालिकाहरु बुफर लगाएर आँगनमा नाच्दै थिए । चिनजानकै एक युवकले फोन गरेर उनलाई घरनजिकैको सडकमा बोलाएका थिए । 

त्यहाँ दुई मोटरसाइकलमा चार युवक थिए । उनीहरूले किशोरीलाई मोटरसाइकलमा राखेर नजिकैको जबदिया गाउँ लगेर बलात्कार गरेका हुन् । छोरीका अनुसार विवाह गर्छु भन्दै बोलाएको बाबुले जानकारी दिए । पीडित पक्षले चिनेका दुई जनाको नाममा किटानी दिएको छ । 

१४ वर्षीया बालिका बलात्कृत 

कैलालीको घोडाघोडी नगरपालिका वडा नम्वर ६ बछेरियामा एक १४ वर्षीय बालिका बलात्कृत भएकी छिन् ।

सोही ठाउ बस्ने ३३ वर्षीय हर्क कुँवरले घरमा कोही नभएको मौकाछोपी भदौ १३ गते राति बालिकालाई बलात्कार गरेको प्रहरीले जानकारी दिएको छ । 

१३ गते रातिको घट्ना प्रहरीमा भने १५ गते मात्र पुगेको ईलाका प्रहरी कार्यालय सुखडका प्रमुख प्रहरी निरीक्षक यक्षराज जोशीले जानकारी दिए । बलात्कृत बालिकाको टीकापुर अस्पतालमा स्वास्थ्य परीक्षण गरिएको छ । कुँवरका नाममा पीडित बालिकाका आफन्तले किटानी जाहेरी दर्ता गराएको र अभियुक्त कुँवर फरार रहेकोले खोजीकार्य जारी रहेको जोशीले जानकार दिए ।  

बालिका बाजेसँग बस्दै आएकी र त्यो दिन बाजे जेठो छोराको घरमा बस्न गएको मौका छोपेर कुँवरले बलात्कार गरेको खुल्न आएको प्रहरीले जानकारी दियो । बालिकाका आमा बुवा अछाममा बस्दै आएका बुझिएको छ । बलात्कृत बालिका कक्षा ७ मा अध्यानरत छिन् ।