निर्वाचन नजिकिँदै गर्दा झन्डै आठ सय कर्मचारीको सरुवा

काठमाडौं- प्रतिनिधिसभा र प्रदेशसभाको निर्वाचन नजिकिँदै सरकारले कर्मचारीको सरुवालाई तिव्रता दिएको छ। केही दिन पहिले एक दर्जन प्रमुख जिल्ला अधिकारीको सरुवा गरेको सरकारले पुन: झन्डै आठ सय कर्मचारीको सरुवा गरेको छ।

निर्वाचन आयोगले निर्वाचन आचारसंहिता लागू गर्ने तयारी गरिरहँदा सरकारले एकै दिन झन्डै ८ सय कर्मचारीको सरुवा गरेको हो।

लोकसेवा आयोगबाट विभिन्न स्थानीय तहमा सिफारिस भई कार्यरत ७ सय ८४ जना कर्मचारीको सरुवा गरिएको संघीय मामिला तथा सामान्य प्रशासन मन्त्रालयले जनाएको छ। मन्त्रालयले सरुवाको लागि २० भदौसम्म निवेदन दिने समय तोकेको थियो।

सरकारले विभिन्न मन्त्रालय र निकायमा हतारहतारमा कर्मचारीको सरुवा गरेको बताइएको छ। आयोग ४ मंसिरमा तय गरिएको निर्वाचनको तयारीमा जुटिसकेको छ। र, आयोगले आचारसंहिता सार्वजनिक गरिसकेको छ। आचारसंहिता लागू हुन भने बाँकी छ। 

आयोगले निर्वाचन आचारसंहिता लागू गरेपछि सरकारले कर्मचारी सरुवा गर्न पाउने छैन।

संघीय मामिला तथा सामान्य प्रशासन मन्त्रालयले आचारसंहिता छल्ने उद्देश्यले एकैदिन ठूलो संख्यामा कर्मचारीको सरुवा गरेको बताइएको छ। सरुवा भएका सबै जना एक स्थानीय तहबाट अर्को स्थानीय तहमा गएका छन्।

लोकसेवा आयोगको सिफारिसमा ‘स्थानीय तहमा नियुक्त भएका कर्मचारीहरूको व्यवस्थापनसम्बन्धी मापदण्ड २०७७’ अनुसार ती कर्मचारीको सरुवा गरिएको मन्त्रालयले जनाएको छ।