भारतीय केरा आयातमा रोक लगाउन माग

भरतपुर- चितवन केरा उत्पादक संघले भन्सार छलेर भित्र्याइएका भारतीय केरा आयातमा रोक लगाउन माग गरेको छ। संघले बुधवार पत्रकार सम्मेलन गरी एक हप्ता भित्रमा केरा आयातमा रोक लगाउनुपर्ने बताएको हो। भारतीय केराको आयात भदौ २९ गतेसम्म नरोकिए किसानहरु चरणबद्ध रुपमा आन्दोलनमा उत्रिने व्यवसायीले चेतावनी दिएका छन्।

संघका अध्यक्ष माधवप्रसाद घिमिरेले चितवनमा वार्षिक ७० हजार मेट्रिकटन केरा उत्पादन भएपनि बाहिरबाट आयात हुँदा जिल्लाको उत्पादनले बजार नपाएको बताउँछन्। ‘एकातिर चितवनमा केराको उत्पादन बढीरहेको छ, अर्कोतिर भारतीय अवैध केरा  निर्वाध रुपमा आयात भइरहेको छ। जसले गर्दा चितवनको केराको बजारीकरणमा अत्यन्त अप्ठयारो अवस्थामा रहेको छ,’ उनले भने।  

समयमै समस्याको समाधान हुन नसके व्यवसायिक रुपमा केरा खेतीमा लागेका कृषक व्यवसायबाटै पलायन हुनसक्ने जोखिम बढेको अध्यक्ष घिमिरे बताउँछन्। भारतीय केरालाई विस्थापित गरी देशलाई केरामा आत्मनिर्भर बनाउन सम्पूर्ण उपभोक्ता, सरकारी तथा गैरसरकारी निकायले सहयोग गर्नुपर्ने संघले बताएको छ। 

केरा उत्पादक संघका निवर्तमान अध्यक्ष घननाथ महत्तो चाडबाड लक्षित गरेर हरियो र मालभोग जातको केरा उत्पादन गरेको भएपनि अहिले भारतीय केराको कारण बजारीकरणको समस्या भइराखेको बताउँछन्। ‘चितवनमा पहिले हरियो केरा पशस्त उत्पादन भइराखेको छ। पछि भारतीय बजारको प्रभावले मौसमी मात्र होइन बेमौसममा पनि मालभोग केरा उत्पादन बढ्दै गएको छ। तर भारतीय केराले हाम्रो सबै बजार खाइदिएको छ,’ उनले भने। 

भारतीय केरा नेपाल भित्राउनका लागि एलसी ‘लेटर अफ क्रेडिट’ खोलेरमात्रै भित्राउन पाइने भए पनि त्यो बिनै अवैध रुपमा केरा भित्रिएकाले किसान ‘पिक आवर’मै मर्कामा परेको उनको गुनासो छ।  

‘अहिले मेरो बारीमा पनि ४०-५० घारी केरा पाकिराखेको छ। बजार लगे बिक्रि हुँदैन त्यसै फाल्नुपर्ने स्थिती आइसकेको छ,’ उनी भन्छन्। चितवनमा हाल  ७२२ जना कृषकले ३ हजार २०० विघा क्षेत्रफलमा केरा खेती गर्दै आएका महत्तो बताउँछन्।