कमेडियन अपूर्व क्षितिज सिंहलाई थप ५ दिन हिरासतमा राख्न अनुमति

काठमाडौं– नेवार समुदायको भावनामा आँच पुर्‍याएको अभियोग लागेका कमेडियन अपूर्व क्षितिज सिंहलाई थप पाँच दिन हिरासतमा राखेर अनुसन्धान गर्न जिल्ला प्रहरी परिसर काठमाडौंले अनुमति पाएको छ। काठमाडौं जिल्ला अदालतले सिंहविरुद्ध अनुसन्धानका लागि थप समय हिरासतमा राख्न बुधबार अनुमति दिएको हो।

भोलि बिहीबार सिंहको अनुसन्धान प्रतिवेदन जिल्ला सरकारी वकिलको कार्यालय काठमाडौंमा पठाइने प्रहरीले बताएको छ। यसअघि अपूर्वका परिवार र नेवार समुदायका अभियन्ताबीच छलफल भएर क्षमापत्र लेखाएर उनलाई छुटाउने प्रक्रिया अघि बढाउने सहमति भएको थियो। क्षमायाचना गरेर भिडियो हटाए पनि एक साताभन्दा लामो समयदेखि हिरासतमा राखिएको भन्दै क्षितिजको रिहाइको माग भइरहेको छ। सामाजिक सञ्जालदेखि संसद्सम्म समेत उनको रिहाइको माग भइरहेको छ।

बुधबारमात्रै संसद्मा विशेष समय लिएर नेकपा एमालेका प्रमुख सचेतक विशाल भट्टराईले आफ्नो हास्य कला प्रस्तुत गर्ने क्रममा कसैलाई मर्का परे पनि क्षमायाचनापछि थुनामा राखिएको भन्दै आपत्ति जनाएका थिए।

कमेडी क्याफे नामक युट्युब च्यानलबाट अपलोड गरिएको ‘नेवारको परम्परा’ शीर्षकको सामग्रीप्रति अभियन्ताहरुले आपत्ति जनाएका हुन्। नेवार समुदायको आक्रोश बढ्न थालेपछि क्षितिजले युट्युबबाट भिडियो हटाएका थिए। 

सम्पदा संरक्षण महाअभियानको नेतृत्वमा १०४ जनाको हस्ताक्षरसहित जिल्ला प्रहरी परिसर टेकुमा किटानी जाहेरी दर्ता गराएपछि प्रहरीले उनलाई भदौ १२ गते अभद्र व्यवहारको कसूरमा पक्राउ गरेको हो।