दुई जना ट्याक्सी चालकविरुद्ध अभद्र व्यवहारमा मुद्दा

काठमाडौं- मदिरा सेवन गरी ट्याक्सी चलाउने दुई जना चालकविरुद्ध ट्राफिक प्रहरीले अभद्र व्यवहार मुद्दा दर्ता गरेको छ। 

प्रहरीले शनिबार राति काठमाडौंको सुकेधाराबाट पक्राउ परेका बा२ज ३३४१ नम्बरको ट्याक्सी चालक सुनसरीका ३४ वर्षीय विकास सुनार र कीर्तिपुरबाट पक्राउ परेका बा२ज ६५४ नम्बरको ट्याक्सी चालक ललितपुर ९ का ४६ वर्षीय राजेन्द्र महर्जनविरुद्ध मुद्दा दर्ता गरेको हो।

सुनारलाई आवश्यक कारबाहीका लागि प्रहरी वृत्त महाराजगञ्ज पठाइएको छ। महर्जनलाई आवश्यक कारबाहीका लागि प्रहरी वृत्त कीर्तिपुरमा बुझाइएको काठमाडौं उपत्यका ट्राफिक प्रहरी कार्यालय रामशाहपथका प्रवक्ता एवं प्रहरी वरिष्ठ उपरीक्षक राजेन्द्रप्रसाद भट्टले जानकारी दिए। 

मादक पदार्थ सेवन गरी सवारी साधन चलाएका उनीहरूलाई कारबाही गर्न खोज्दा आवश्यक कागजपत्र नदिनुका साथै ट्राफिक प्रहरीमाथि नै अभद्र व्यवहारसमेत गरेका थिए। 

प्रहरी वृत्तहरूमा बुझाइएका दुवै चालकलाई अभद्र व्यवहारको कसुरमा मुद्दा चलाउन म्याद थपका लागि जिल्ला अदालत पठाइएको छ। 

सार्वजनिक सवारी साधनका चालकहरूले मापसे गरेर सवारी साधन चलाउन थालेपछि दुर्घटनाको जोखिम बढेको ट्राफिक प्रहरीले जनाएको छ। सम्भावित दुर्घटनालाई रोक्नका लागी ट्राफिक चेकजाँचलाई तीव्रता दिइएको प्रहरी वरिष्ठ उपरीक्षक भट्टले जानकारी दिए।