देशका विभिन्न स्थानमा डुबेर चार जनाको मृत्यु

काठमाडौं- देशका भिन्नाभिन्नै स्थानमा डुबेर चार जनाको ज्यान गएको छ। कपिलवस्तुको महाराजगंज नगरपालिका-८ वाणगंगा नदीमा डुबेर सोही नगरपालिका कजरहवा बस्ने रमेश बर्माको ९ वर्षीय छोरा मोहित बर्माको शनिबार दिउँसो मृत्यु भएको हो। 

उक्त नदीमा नुहाउने क्रममा डुबेर अशक्त भएका उनको जिल्ला अस्पताल तौलिहवामा उपचारको क्रममा मृत्यु भएको हो। 

कैलाली, टिकापुर नगरपालिका-२ जनशक्ति सामुदायिक वनस्थित मुलपानी तलाउमा डुबेर जानकी गाउँपालिका-८ पहाडीपुर बस्ने २० वर्षीय पुष्प राज उपाध्यायको शनिबार दिउँसो मृत्यु भएको छ। उक्त तलाउमा नुहाउने क्रममा डुबेर अशक्त भएका उनको टीकापुर अस्पतालमा उपचारको क्रममा मृत्यु भएको हो। 

महोत्तरी, गौशाला नगरपालिका-४ रजखोर बस्ने संजित आलेको ७ वर्षीय छोरा अमर आलेको सोही ठाउँस्थित ईटा भट्टाको पानी जमेको खाल्डोमा डुबेर शनिबार दिउँसो मृत्यु भएको छ। खेल्ने क्रममा उक्त खाल्डोमा डुबेर अशक्त भएका उनको प्राथमिक स्वास्थ्य केन्द्र गौशालामा उपचारको क्रममा मृत्यु भएको हो। 

नवलपरासी (पश्चिम), बर्दघाट नगरपालिका-७ जिमिरेभार बस्ने सिताराम चौधरीको ७ वर्षीय छोरा निखिल चौधरीको सोही नगरपालिका-१४ खजुरे खोलामा डुबेर शनिबार दिउँसो मृत्यु भएको छ। उक्त खोलामा पौडी खेल्ने क्रममा डुबेर अशक्त भएका उनको स्थानीय मेडिकलमा उपचारको क्रममा मृत्यु भएको हो। 

यस सम्बन्धमा प्रहरीले थप अनुसन्धान गरिरहेको छ।