धान गोडेर फर्कंदै गरेका एकै परिवारका तीन जनाको हत्या, आरोपित पक्राउ

काठमाडौं- उदयपुरको बेलका नगरपालिका वडा नम्बर ७ मा एकै परिवारका तीन जनाको हत्या भएको छ। ३७ वर्षीय राजकुमार बस्नेत, उनकी श्रीमती ३३ वर्षीया सरिता बस्नेत र उनीहरुको छोरा १२ वर्षीय सुजन बस्नेतको हत्या भएको हो। 

गाउँकै एक युवाले खुकुरी प्रहार गरेर हत्या गरेको आरोप लागेको छ। आरोपित व्यक्ति पक्राउ गरिसकेको बेलकाका मेयर अशोक कार्कीले जानकारी दिए। हत्यापछि फरार रहेका ४० वर्षीय नरबहादुर बस्नेतलाई प्रहरीले खुकुरीसहित पक्राउ गरेको छ। 

बेलकाका मेयर कार्कीका अनुसार राजकुमारको परिवार र नरबहादुरको परिवार नजिकका नातेदार हुन्। पुरानो रिसईबीका कारण नरबहादुरले तीनै जनाको हत्या गरेको हुनसक्ने अनुमान गरिएको छ। 

खोला किनारको खेतमा धान गोढेर फर्कने क्रममा शुक्रबार बिहान साढे १० बजेतिर हत्या भएको अनुमान कार्कीको छ। सरिता र सुजनको शव खोलामा भेटिएको थियो भने राजकुमारको शव केही मास्तिर भेटिएको थियो। शवलाई पोस्टमार्टमका लागि उदयपुर अस्पताल पठाउने तयारी भइरहेको कार्कीले जानकारी दिए।