कोहलपुरका मेयरको रोकिएको डोजर: आक्रोशित भीड हटाउने कि संरचना?

कोहलपुर- यसै पनि मानिसको भिडभाड हुने कोहलपुरको बसपार्क। तीजको दर खाने दिन बसपार्कमा यात्रुहरु गन्तव्यमात्र खोजिरहेका थिएनन्, नाचगान र रामरमाइलो पनि चलिरहेको थियो। पसल र होटलमा पर्वले बढेको व्यापार व्यवसाय नहुने कुरै भएन। 

यस्तो अवस्थामा कोहलपुर नगरपालिकाका मेयर पूर्णप्रसाद आचार्य डोजर लिएर बसपार्क छिरे। कोहलपुर नगर विकास समितिको जग्गा अतिक्रमण गरी बनाइएका संरचना हटाउन अल्टिमेटम दिइएको थियो। सार्वजनिक रुपमा ३५ दिने सूचना जारी भइसकेको थियो भने संरचना हटाउनका लागि थप पाँच दिनको समय दिइएको थियो। यसरी ४० दिनको समय सीमा दिँदा पनि संरचना हटाउने विषयले प्राथमिकता पाउन सकेन। यसलाई संरचना निर्माण गरेर उपभोग गर्नेहरुले सरकारी प्रक्रियाको रुपमा मात्र बुझे। तर गत सोमबार तीजको अघिल्लो दिन दर खाने तयारी भइरहँदा नगरपालिकाले डोजर निकाल्यो। 

कोहलपुरको न्यूरोडमा अतिक्रमण गरी बनाइएका ३-४ वटा संरचना तथा टहराहरु भत्काएर बसपार्क पुगेको डोजरमाथि स्थानीयले ढुंगा प्रहार गरे। स्थानीय उल्टै डोजरमाथि नै जाइलागेपछि तनाव उत्पन्न भयो। विवादलाई हिंसात्मक हुन नदिनका लागि व्यापक रुपमा प्रहरी परिचालन गरियो। अवैध संरचना भत्काउने उद्देश्यसहित बसपार्क छिरेका मेयर आचार्यलाई अरिंगालकै गोलोमा हात हालेको महसुस मात्र भएन, त्यहाँबाट रित्तो हात फर्किनुपर्यो। 

चाडबाडको मुखमा कोहलपुरमा हंगामा भएपछि सर्वपक्षीय बैठक बस्यो। बैठकमा सबैले अतिक्रमित जग्गा हटाउने विषयमा ऐक्यवद्धता त जनाए तर पुनर्स्थापनाको माग राखे। 'राजनीतिक रुपमा सबै एक ठाउँमा भए पनि केही व्यक्तिले अवैध कार्यको संरक्षण गरिरहेका छन्,' मेयर आचार्यले भने, ‘केही सय मतका लागि जसले राजनीतिक गरिरहेको छ, त्यसलाई जनताले चिन्नुपर्छ।’ 

व्यवसायीहरूले डोजर चालकमाथि ढुंगा प्रहार गर्न थालेपछि अवरोध हटाउने काम रोकिएको छ। स्थानीय व्यवसायीले विकल्प दिएर मात्रै संरचना हटाउन भनेका छन्। मेयर आचार्यले आफूहरूको अभियानमा अवरोध भए पनि काममा सहयोग गर्न नगरवासीसँग आग्रह गरेका छन्। इलाका प्रहरी कार्यालय कोहलपुरका प्रहरी नायब उपरीक्षक ऐनबहादुर मल्ल, जिल्ला ट्राफिक प्रहरी प्रमुख एवम् प्रहरी निरीक्षक हिमालय शाहसहितको टोली लिएर कोहलपुर क्षेत्रमा अतिक्रमित संरचना हटाउने अभियान सुरु भइसकेको मेयर आचार्यले बताए। 'यो एउटा अभियान हो, यो केही दिन स्थगित हुन सक्छ तर रोकिँदैन। सार्वजनिक जग्गामा बसेर कोही कसैको छायामा राज्यलाई दोहन गर्न कसैलाई छुट हुँदैन।' 

कोहलपुर नगर विकास समितिले गत ३० असारको बोर्ड बैठकबाट निर्णय भएअनुसार तत्काल सडकपेटी र फुटपाथमा बनाइएका अवैध संरचना हटाउने निर्णय गरेको मेयर आचार्यले जानकारी दिए। अब सुरक्षाकर्मी थपेर भए पनि कोहलपुर नगरपालिकाभित्रका सरकारी जग्गामा गरिएको अवैध कब्जा हटाउने उनको भनाइ छ। आज पनि बसपार्क बजार सुधार समितिसहित सर्वदलीय बैठक राखिएको छ। आजको बैठकमा बसपार्क बजार सुधार समितिका तर्फबाट त्यहाँ बनेका घरटहरा नभत्काउनुपर्ने कुनै कानुनी आधार प्रमाण भए पेश गर्न मेयर आचार्यले भनेका छन्। नभए आजैबाट संरचना हटाउने मेयरको मनस्थिति छ। 

कोहलपुर उदाउँदो सहर हो। सहर निर्माणको झण्डै तीन दशकपछि कोहलपुरका बसपार्क सहितका केही क्षेत्र तत्काल सुधार हुनुपर्ने स्थानीय अगुवाहरु बताउँछन्। अहिले सुधार नभए भोलिको समयमा व्यवस्थापन गर्न समस्या हुने भएकाले नगरपालिकाको कदमलाई धेरैले सकारात्मक रुपमा लिएका छन्। 

बसपार्क क्षेत्रमा वर्षौंअघि निर्माण भएका टहरा सञ्चालनमा छन्। चालू आर्थिक वर्षबाट यी सबै संरचना प्रक्रियामा समेत अवैध छन्। किनकी नगर विकास समितिले सम्झौता नवीकरण गरेको छैन। यी संरचनामा सरकारलाई सानो शुल्क तिरेर विचौलियाले करोडौंको खेल खेल्ने गरेको मेयरले बताएका छन्। यी संरचना पटक पटक हटाउन खोजिएको देखिन्छ। एक पटक यो विवाद अदालती प्रक्रियामा समेत गएको थियो। अदालतको आदेशपछि दुई वर्ष अगाडि यी संरचना हटाउन खोज्दा कोभिडले प्रभाव पारेको थियो। यस पटक धेरैले चाडपर्वको मुखैमा संरचना भत्काउन नहुने भनेर संवेदना देखाएका छन्। 

संरचना निर्माण गर्ने र अहिले ती संरचना हटाउन अवरोध पुर्याउनेमा ठूलो गिरोह नै सक्रिय बनेको मेयरको बुझाइ छ। मेयर आचार्यले यो मुद्दालाई आगामी मंसिर ४ को निर्वाचनको प्रमुख स्थानीय मुद्दा बनाउने प्रतिक्रिया समेत दिएका छन्। जसले अतिक्रमण हटाएर कोहलपुरको विकासमा साथ दिन्छ, त्यसैलाई कोहलपुरका जनताले भोट दिने वातावरण बनाउने मेयर आचार्यले बताए। 

मेयर आचार्यको गतिविधिलाई कतिपयले काठमाडौं महानगरपालिकाका मेयर बालेन शाहको कार्यशैली अपनाउन थालेको भन्दै आलोचनात्मक टिप्पणी गरेका छन्। काठमाडौंबाट सुरु भएको अतिक्रमित र अनधिकृत संरचना हटाउने अभियान देशका विभिन्न पालिकाले सुरु गरेको भनेर केही स्थानीयले बुझेका छन्। तर मेयर आचार्यले यो कोहलपुरकै आवश्यकता, प्राथमिकता र नगरको नियमित कार्य भएकाले कोही कसैबाट प्रभावित हुनुपर्ने, कसैको कार्यशैली नै अपनाउनुपर्ने जरुरी नभएको बताए। 

कोहलपुर नगरपालिकाले प्रस्तावित अन्तर्राष्ट्रिय क्रिकेट मैदान परिसरमा रहेका अतिक्रमित संरचना हटाउन समेत सूचना जारी गरिसकेको छ। 'यस्ता धेरै संरचनाहरु हामीले देखेका छौँ, कहाँ कति जग्गा कब्जामा परेको छ भन्ने तथ्यांक छ, कानुनी रुपमै हामीले यी जग्गा खाली गराउँछौँ,' मेयरले भने।