धुनीबेशीले काठमाडौं महानगरलाई सम्झायो फोहोर व्यवस्थापनबारे स्थानीयसँग भएको सम्झौता

काठमाडौं-  धादिङ जिल्लास्थित धुनिवेशी नगरपालिकाले नगरका स्थानीय र काठमाडौं महानगरबीच भएको सम्झौता अक्षरस: पालना गर्न महानगरलाई स्मरण गराएको छ।

नगरपालिका अन्तर्गतको वातवरण तथा विपद व्यवस्थापन समितिले बिहिबार प्रेस विज्ञप्ति जारी गर्दै व्यवस्थित फोहोर विसर्जनको दीर्घकालीन समाधान खोज्न महानगरलाई अपिल गरेको हो।

धुनिबेसी नगरपालिकाको वडा नं.१, ३ र ४ तथा नुवाकोट जिल्लाको ककनी गाउँपालिका वडा १, २ र ३ का स्थानीय  बासिन्दाले फोहोर विसर्जनलाई व्यवस्थित गर्न माग गर्दै आएका छन्। धुनीबेँशीको प्रश्न छ, 'काठमाडौं उपत्यकाको फोहोर विसर्जन गरिने स्थान बनाइएको कुडुल्ले बञ्चरेडाँडा आसपासका क्षेत्र धुनिबेसी नगरपालिकाको वडा नं.१, ३ र ४ तथा नुवाकोट जिल्लाको ककनी गाउँपालिका वडा १, २ र ३ का स्थानीय बासिन्दाले काठमाडौं महानगरपालिकाले गरेको अव्यवस्थित फोहोर विसर्जनका कारण कहालीलाग्दो नारकीय जीवन व्यतित गरी कति समय बाँच्न पर्ने हो?'

पटकपटकको वार्ता र सहमतिपछि पनि माग पुरा गर्नको सट्टा स्थानीयमाथि प्रहरी बल प्रयोग गरेर फोहोर विसर्जन गर्न काम भएको भन्दै नगरपालिकाले गुनासो समेत व्यक्त गरेको छ।