आयव्यय विवरण नबुझाउने दललाई निर्वाचनमा सहभागी हुन रोक

काठमाडौं– निर्वाचन आयोगले वार्षिक आयव्यय विवरण नबुझाउने राजनीतिक दललाई आगामी संघीय र प्रदेशसभा निर्वाचनमा सहभागी हुन रोक लगाउने भएको छ।

आयोगमा ११६ राजनीतिक दल दर्ता छन्। तीमध्ये आगामी ४ मंसिरमा हुने संघ र प्रदेशसभा निर्वाचन प्रयोजनका लागि ८४  राजनीतिक दल मात्रै दर्ता भएको आयोगले बताएको छ। 

आयोगका सहायक प्रवक्ता सूर्यप्रसाद अर्यालले वार्षिक आयव्यय विवरण नबुझाउने राजनीतिक दललाई निर्वाचनमा सहभागी नगराइने बताए। दल दर्ताका लागि आवश्यक कागजातमध्ये राजनीतिक दलको वार्षिक आयव्यय विवरणको अडिट रिपोर्ट पनि अनिवार्य बुझाउनुपर्ने उनले जानकारी दिए। 

आयोगमा दर्ता भएका दलले बुझाएको कागजातको अध्ययन भइरहेको र अध्ययन सकेर केही दिनमै निर्वाचनमा भाग लिन पाउने राजनीतिक दलको सूची सार्वजनिक गरिने उनको भनाइ छ।

सहायक प्रवक्ता अर्यालले दलहरुले आयव्यय विवरण नबुझाएको पाइए पुनः माग गर्ने र माग गर्दा पनि नबुझाएको अवस्थामा निर्वाचनमा भाग लिन नदिइने जानकारी दिए। उनले निर्वाचनलाई सहज बनाउन सम्बन्धित निर्देशिका तथा नियमावली संशोधन र परिमार्जन गरिरहेको बताए।