काठमाडौं– जाग्यो नेपालका अभियन्ताहरुले शनिबार बिहान काठमाडौंको गहनापोखरी सरसफाइ गरेका छन्। स्थानीयको सहयोगमा पोखरीको लेउ हटाउने, पोखरी वरिपरिको घाँस काट्ने, रुख बिरुवाका फैलिएका हाँगा हटाउने तथा छिमल्ने काम गरिएको हो।
शनिबार र बिदाका दिन बिहानको समय सदुपयोग गरी विभिन्न सार्वजनिक स्थानहरु सफा गर्ने गरिएको अभियानका संयोजक विजय कँडेलले बताए। राजधानीलाई धुलोरहित बनाउने अभियानसहित जाग्यो नेपालले करिब ५ वर्षअघि सफाइ अभियान थालेको हो।
यसअघि कोरोना भाइरस लगायतका कारण सफाइ अभियान नियमित गर्न नसकिएको जनाउँदै कँडेलले आगामी दिनमा प्रत्येक शनिबार विभिन्न स्थान सफा गरिने बताए।