८४ दलको कागजात खोतल्दै आयोग

काठमाडौं– निर्वाचन आयोगले आगामी ४ मंसिरमा हुने प्रतिनिधिसभा चुनावी प्रयोजनका लागि दर्ता भएका राजनीतिक दलका निवेदन अध्ययन गरिरहेको छ। आउँदो निर्वाचन प्रयोजनका लागि आयोगमा ८४ दल दर्ता भएका छन्।

८४ दलले दर्ताका लागि बुझाएको आवश्यक कागजातमाथि जाँचबुझ गरिरहेको निर्वाचन आयोगका प्रवक्ता शालिग्राम शर्मा पौडेलले बताए। जाँचबुझका क्रममा दलहरूले बुझाउनुपर्ने कागजात नपुगे वा अस्पष्ट भए पुनः कागजात मागिने उनको भनाइ छ।

आयोगले आगामी ८ भदौमा दर्ता भएका दलको अन्तिम विवरण प्रकाशन गर्ने तयारी गरेको छ। विवरण प्रकाशन गरेपछि उनीहरूले संघ, प्रदेश, प्रत्यक्ष तथा समानुपातिक निर्वाचनमा सहभागी हुन  निवेदन दिनुपर्नेछ। आयोगले २२ देखि २९ साउनसम्म दल दर्ताका लागि समय दिएको थियो। 

राजनीतिक दलहरूले २–३ असोजमा समानुपातिक तर्फको निर्वाचनका लागि बन्दसूची बुझाउने कार्यसूची छ। यस्तै, निर्वाचनका लागि आवश्यक पर्ने सामग्री खरिद प्रक्रिया सुरु गरिएको आयोगले बताएको छ। आयोगले आगामी २० भदौदेखि समानुपातिकतर्फको मतपत्र छपाइ सुरु गर्ने भएको छ। २–३ असोजमा समानुपातिक तर्फको बन्दसूची पेस गर्ने कार्यसूची तय गरेको छ।

यस्तै, प्रत्यक्ष निर्वाचनतर्फ २५ भदौमा निर्वाचन कार्यक्रम सञ्चालन, ११ असोजमा निर्वाचन अधिकृत नियुक्ति, २१ असोजमा निर्वाचन कार्यालय स्थापना, २३–२६ असोजसम्म उम्मेदवारी दर्ता, २८ असोजदेखि २७ कात्तिकसम्म प्रत्यक्ष निर्वाचनका लागि मतपत्र प्रकाशन, २७ कात्तिकदेखि मतपत्र ढुवानी र १ मंसिरदेखि चुनाव प्रचार प्रसार बन्द गर्ने कार्यसूची बनाएर काम गरिरहेको आयोगले जनाएको छ।