एमालेद्वारा नागरिकता विधेयक विषयगत समितिमा पठाउन माग

काठमाडौं– प्रमुख प्रतिपक्षी नेकपा एमालेले नागरिकता ऐन संशोधन विधेयक पुनर्विचारका लागि विषयगत समितिमा पठाउन माग गरेको छ। बिहीबार कार्यव्यवस्था परामर्श समितिको बैठकमा सहभागी एमाले प्रमुख सचेतक विशाल भट्टराई, कृष्णभक्त पोखरेल र शेरबहादुर तामाङले नागरिकता विधेयक विषयगत समितिमा पठाउन माग गरेका हुन्। राष्ट्रपतिले चासो देखाएर पुनर्विचार गर्न फिर्ता पठाउनुलाई राजनीतिक आँखाले हेर्न नहुने उनीहरुको भनाइ छ।

‘यसलाई समितिमा लैजाऔं, छलफल गरौं, बहुमत, अल्पमतले निर्णय गर्न मिलिहाल्छ। बहुमतले नै पास गर्नुहोला तर कम्तीमा छलफल होस्,’ भट्टराईले भने। 

संसद्का दुवै सदनबाट पास भइसकेको नागरिकता विधेयक १५ साउनमा सभामुख अग्निप्रसाद सापकोटाले राष्ट्रपतिकहाँ प्रमाणीकरणका लागि पठाएका थिए। तर राष्ट्रपति भण्डारीले १५ बुँदे सन्देशसहित २९ गते उक्त विधेयक प्रतिनिधिसभामै फिर्ता पठाएकी थिइन्। ३१ साउनमा बसेको सत्ता गठबन्धनको बैठकले उक्त विधेयक हुबहु अघि बढाउने निर्णय गरेको थियो।

सोही अनुसार बिहीबारको प्रतिनिधिसभा बैठकबाट विधेयक पारित गर्ने र आवश्यक प्रक्रिया पूरा गरी पुनः राष्ट्रपतिकहाँ पठाउने सरकारको तयारी छ। प्रमाणीकरणका लागि पुनः आएको विधेयक राष्ट्रपतिले फिर्ता पठाउन नमिल्ने संवैधानिक व्यवस्था छ।