पाल्पामा थपिए ६ हजार बढी मतदाता

पाल्पा– पाल्पामा ६ हजार बढी नयाँ मतदाता थपिएका छन्। गत १ असारदेखि १९ साउनसम्म सञ्चालन भएको फोटोसहितको मतदाता नामावली संकलनमा नयाँ मतदाताले नाम दर्ता गराएपछि ६ हजार ६७० नयाँ मतदाता थपिएका हुन् ।

प्रतिनिधिसभा र प्रदेशसभा निर्वाचनका लागि जिल्ला निर्वाचन कार्यालय र जिल्ला प्रशासन, इलाका प्रशासन कार्यालयबाट फोटोसहितको मतदाता नामावली संकलन गरिएको थियो।

उक्त नामावलीमा साढे ६ हजार बढी मतदाता थपिएको जिल्ला निर्वाचन कार्यालयका निर्वाचन अधिकारी रुक्मांगत अर्यालले बताए। उनका अनुसार तीन हजार १४० महिला र ३ हजार ५३० पुरुष थपिएका हुन्।

गत वैशाखमा सम्पन्न स्थानीय तह निर्वाचनमा जिल्लामा १ लाख ९९ हजार ६९० मतदाता रहेकामा पछिल्लो थप विवरणसहित २ लाख ६,३६० मतदाता पुगेका हुन्।यसैबीच प्रतिनिधिसभा र प्रदेशसभा निर्वाचनका लागि जिल्लामा १३ मतदान स्थल थप गर्न सिफारिस गरिएको छ। प्रमुख जिल्ला अधिकारी जगन्नाथ पन्तको अध्यक्षतामा बसेको बैठकले तोकिएको समयसीमामा थप समय उपलब्ध गराउन निर्वाचन आयोगसमक्ष आग्रह गरिएको छ।

सरकारले आगामी ४ मंसिरमा एकै चरणमा निर्वाचन घोषणा गरेसँगै निर्वाचन आयोगले मतदाता नामावली संकलन २० साउनदेखि स्थगित गरेको थियो। स्थानीय तह निर्वाचनसम्म करिब १० हजार मतदाताको १८ वर्ष उमेर नपुगेका कारण अन्तिम मतदाताको सूचीमा नाम समावेश भएको थिएन। –रासस