एनएमबी बैंकले आईएफसीबाट लियो ३ अर्ब १७ करोड ऋण

काठमाडौ– एनएमबी बैंकले अन्तराष्ट्रिय वित्त निगम (आईएफसी)बाट २ करोड ५० लाख डलर अर्थात् ३ अर्ब १७ करोड ८० लाख रुपैयाँ बराबरको कर्जा लगानी लिएको छ । 

बैंकका प्रमुख कार्यकारी अधिकृत सुनिल केसी र आईएफसीको दक्षिण एशिया क्षेत्रिय निर्देशक हेक्टर गोमेज आंगबीच बिहीबार कर्जा लगानीसम्बन्धी समझदारी पत्रमा हस्ताक्षर भएको हो।

बैंकका अनुसार यो कर्जाले हालको असहज परिवेशमा उत्पादनमूलक क्षेत्रमा कर्जा लगानी बढाउन मद्दत पुग्नेछ। 

बैंकले योसहित आईएफसीबाट लगातार तीन पटकसम्म कर्जा लिइसकेको छ। यसरी लिइएको कर्जाबाट साना तथा मझौला कर्जाको क्षेत्रमा भएको खाडललाई परिपूर्ति गर्न र उक्त क्षेत्रमा नयाँ उद्यमीलाई प्रोत्साहित गर्न सक्षम बनाउने विश्वास बैंकको छ। 

एनएमबी बैंक यसअघि लन्डनबाट प्रकाशित हुने ‘द बैंकर’ पत्रिकाद्वारा एशियाकै सर्वोत्कृष्ट बैंकको उपाधि बैंक अफ द इयर एसिया २०२१ बाट सम्मानित भइसकेको छ। बैंकले २०१७, २०१८, २०२० र २०२१ का लागि पनि उक्त पत्रिकाद्वारा चार पटक नेपालकै उत्कृष्ट बैंकको उपाधि ‘बैंक अफ द इयर नेपाल’ प्राप्त गरिसकेको छ।

नेपालमा साना तथा मझौला व्यवसायीको हितमा काम गरेको भन्दै बैंकले पटक–पटक उपाधि प्राप्त गरेको हो । 

बैंकले हाल देशभर २०१ शाखा, १३८ एटिएम र ११ एक्सटेन्सन काउन्टरमार्फत बैंकिङ सेवा दिँदै आएको छ।