प्रधानन्यायाधीशको नाम आज सिफारिस हुने

काठमाडौ- लामो समयदेखि बस्न नसकेको संवैधानिक परिषद्को बैठक बिहीबार बस्दैछ । प्रधानमन्त्री केपी शर्मा ओलीको आह्वानमा दिउँसो ४ बजे बैठक बस्न लागेको हो । 

बैठकले नयाँ प्रधानन्यायाधीशको नाम सिफारिस गर्ने स्रोतले जनाएको छ । प्रधानन्यायाधीशका लागि ओमप्रकाश मिश्र र चालेन्द्रशम्सेर जवरालाई मुख्य दावेदार मानिएको छ।

तर, कामु प्रधानन्यायाधीशको जिम्मेवार सम्हाली रहेका मिश्र जबरा भन्दा सिनियर भएकाले उनको नाम नै सिफारिस हुने सम्भावन प्रवल छ । विपक्षी दल कांग्रेसले पनि मिश्रको नाममा अनौपचारिक सहमति जनाएको स्रोतको दाबी छ । 

यसअघि परिषदले दीपकराज जोशीलाई प्रधानन्यायाधीशका लागि सिफारिस गरेको थियो । तर जोशीको नाम संसदीय सुनुवाई विशेष समितिले अस्वीकृत गरेपछि फेरि नयाँ नाम सिफारिस गर्नुपर्ने भएको हो ।

यस्तै आजको बैठकमा अख्तियार दुरुपयोग अनुसन्धान आयोगको प्रमुख आयुक्तका लागि समेत नाम सिफारिस हुन सक्ने सम्भावना रहेको स्रोतको दावी छ । आयोग लामो समयदेखि प्रमुख आयुक्त विहिन छ ।