सुर्खेतमा पनि आन्दोलन, बलात्कारीलाई फाँसी दिन माग

सुर्खेत- बलात्कारीलाई फाँसीको माग गर्दै सुर्खेतका महिलाहरु पनि आन्दोलित भएका छन्। 

पछिल्लो समय देशभर बलात्कारका घटनाहरु बृद्धि हुँदा समेत सरकारले कडा कानून बनाउन नसको भन्दै सुर्खेतका महिलाहरु आन्दोलित भएका हुन्। राष्ट्रिय प्रजातान्त्रिक महिला संगठन सुर्खेतको अगुवाईमा सडकमा उत्रिएका महिलाहरुले तत्काल कानून परिमार्जन गरी बलात्कारीलाई फाँसी दिने कानून बनाउन माग गरेका छन्। 

श्रृङखलाबद्ध बलात्कार, हत्या, असुरक्षा र महिला हिंसाको बिरोध गर्दै बुधबार साँझ सुर्खेतका प्रमुख जिल्ला अधिकारी मार्फत सरकारलाई ज्ञापनपत्र बुझाएको हुन्।

‘एक्काइसौं शताब्दीमा पनि महिलाहरु यौनजन्य हिंसाको शिकार हुनु परेको छ।’ राष्ट्रिय प्रजातान्त्रिक महिला संगठन सुर्खेतका अध्यक्ष सितादेवी खाणले भनिन् ‘सरकारले कडाभन्दा कडा कानून ल्याओस् र बलात्कारीलाई फाँसी देवस् भनेर आन्दोलित भएका हौँ।’

संविधानमै नभएको बलात्कारीलाई फाँसी दिने माग सम्भव छ भन्ने प्रश्नमा उनले भनिन्, ‘संविधान र कानून सयमअनुकुल हुनुपर्छ, कित दिदीबहिनीहरुमाथि हुने बलात्कारका घटनाहरु रोकिनु पर्‍यो हैनभने फाँसीको सजाय हुनैपर्छ।’ 

उनीहरुले बलात्कारीलाइ फाँसी दे, महिला हिंसा अन्त्य गर, महिला अधिकार सुनिश्चित गर लगायत नारासहित जिल्ला प्रशासन कार्यालय सुर्खेतमार्फत सरकारलाई ज्ञापन पत्र बुझाएका थिए।