सिराहामा विद्युत चुहावट ७ प्रतिशत घट्यो

सिराहा- सिराहामा विद्युत् चुहावट सात प्रतिशतले घटेको छ। विद्युत् चुहावट नियन्त्रण अभियान सञ्चालन भएपछि आर्थिक वर्ष २०७८/७९ मा सिरहाको लहान क्षेत्रमा विद्युत् चुहावटमा कमी आएको हो। एक हजार ९७२ नयाँ ग्राहक थपिएका छन्।  

विद्युत् प्राधिकरण वितरण केन्द्र लहानले चुहावट नियन्त्रणका लागि अभियान सञ्चालन गरेपछि चुहावट घटेर २५ प्रतिशतमा झरेको हो। गत आर्थिक वर्ष २०७७/७८ मा ३२ प्रतिशत विद्युत् चुहावट हुँदै आएकामा आव २०७८/७९ मा विद्युत् चुहावट २५ प्रतिशतमा झेरेको विद्युत् प्राधिकरण वितरण केन्द्र लहानका प्रमुख जितेन्द्रकुमार यादवले जानकारी दिए। 

यस्तै आव २०७८/७९ मा विद्युतको महसुल नबुझाउने एक हजार ७९४ ग्राहकको विद्युत् लाइन काट्दा एक हजार ३५४ ग्राहकबाट रु पाँच करोड दुई लाख ६७ हजार बाँकी बक्यौता रकम असुली भएको प्रमुख यादवको भनाइ छ। त्यस्तै केन्द्रले सो अवधिमा हुकिङ गरी विद्युत् चुहावट गर्ने २१ जनालाई पक्राउ गरी जरिबानावापत रु १६ लाख ४१ हजार राजस्व संकलन गरेको जनाएको छ। सो क्रममा ७९ विद्युत् उपकरणसमेत बरामद गरिएको प्रमुख यादवले बताए। 

त्यस्तै विद्युत् मिटरबाट विद्युत् चोरी गर्ने १५ जनामाथि कारबाही गरी रु २१ लाख १७ हजार राजस्व संकलन गरिएको केन्द्रले जनाएको छ। रिकनेक्सन दस्तुरबापत रु नौ लाख ८५ हजार राजस्व संकलन भएको यादवले जानकारी दिए। आव २०७८/७९ मा एक हजार नौ सय ७२ ग्राहक थपिएका छन्। योसँगै लहान क्षेत्रमा ग्राहकको संख्या ६५ हजार तीन सय २४ पुगेको छ। यसअघि आव २०७७/७८ वितरण केन्द्रले रु एक करोड ५० लाख राजस्व संकलन गरेको थियो।