कर्णालीमा राष्ट्रिय नाटक महोत्सव हुने

सुर्खेत- कर्णाली प्रदेशमा पहिलो पटक राष्ट्रिय नाटक महोत्सव हुने भएको छ। प्रदेशको राजधानी सुर्खेतमा हुने महोत्सवका लागि तयारी तिव्र पारिएको रंगकर्मी गणेशभक्त गौतमले जानकारी दिए। 

‘महोत्सवका लागि प्रदेश सरकारसँग समन्वय गरेका छौँ।’ रंगकर्मी गौतमले भने ‘कर्णालीको लोक नाट्य र अभिनयलाई देशभर चिनाउने उद्देश्यले महोत्सव आयोजना गर्न थालेका हौँ।’ सुर्खेत कला र रंगमञ्चको तिर्थ स्थलभएको जिकिर गर्दै गौतमले भने, ‘महोत्सवमा सातवटै प्रदेशका नाटकहरु प्रर्दशन हुनेछन्, जो कर्णालीका लागि गौरवको कुरा हो।’ 

कर्णाली लोक नाट्य र अभिनयबाट देशभर रंगमञ्चिय गतिविधीको सन्देश दिन नाटक महोत्सवको आयोजना गरिएको उनको भनाई छ। महोत्सवका लागि साँस्कृतीक संस्थान, राष्ट्रिय नाचघर, कर्णाली प्रदेश सरकारलगायतको सहयोग रहने अर्का रंगकर्मी प्रेमदेव गिरीले बताए।
 
यसैबीच, सुर्खेतका वरिष्ठ रंगकर्मी एवं कलाकार प्रेमदेव गिरी, गणेशभक्त गौतम, प्रकाश पौडेल, याम नारायण आचार्य, उत्तम शर्मा लगायतको टोलीले सामाजिक विकास मन्त्री दल रावललाई भेटेर महोत्सवका बारेमा आधिकारीक जानकारी दिएका छन्। 

सुर्खेतमा रही लामो समयसम्म रंगमञ्चिय गतिविधी गर्दै आएको आरंग नेपालले राष्ट्रिय नाटक महोत्सव आयोजना गर्न थालेको हो। महोत्सवको मितिभने केही दिनपछि तय गर्ने आयोजकले जानकारी दिएको छ।