पत्रकारले सत्यतथ्य सूचना सम्प्रेषण गरे मात्रै लोकतन्त्र संस्थागत : प्रधानमन्त्री देउवा

काठमाडौं- प्रधानमन्त्री शेरबहादुर देउवाले सञ्चार माध्यमलाई पछिल्लो प्रविधिअनुरूप परिमार्जित गर्दै लैजानुपर्नेमा जोड दिएका छन्।

बुधबार काठमाडौंमा राष्ट्रिय समाचार समितिको नवनिर्मित कार्यालय भवन उद्घाटन गर्दै प्रधानमन्त्री देउवाले यस्तो बताएका हुन्।

सहज र आधुनिक माध्यमबाट नागरिकलाई सत्यतथ्य सूचना प्रकाशन गर्न सक्नुपर्ने आवश्यकता उनले औंल्याए। पत्रकारले सत्यतथ्य सूचना सम्प्रेषण गर्न सके मात्रै लोकतन्त्र संस्थागत हुने उनको भनाइ छ।

प्रधानमन्त्री देउवाले नागरिकलाई शिक्षित र सुसूचित गर्न सञ्चार माध्यमले सत्यतथ्य सूचना प्रसारण गर्न जरुरी रहेको उल्लेख गरे।

उनले तथ्यहीन, भ्रामक समाजमा द्वेष फैलाउने वा अतिरञ्जना पैदा गर्ने सूचनाले नागरिकमा भ्रम सिर्जना हुने र पत्रकारिताको मूल मर्ममाथि पनि प्रहार हुने हुँदा स्वच्छ पत्रकारिताको विकास गर्न आवश्यक रहेकामा जोड दिए।