पाकिस्तानको छात्रवृत्तिमा चिकित्सा शिक्षा पढ्न आवेदन माग

काठमाडौं- पाकिस्तान सरकारले दिने छात्रवृत्तिमा चिकित्सा शिक्षा स्नातक तह अध्ययनका लागि आवेदन माग गरिएको छ। 

चिकित्सा शिक्षा आयोगले मंगलबार सूचना जारी गरी शैक्षिक शत्र २०२२/२०२३ का लागि पाकिस्तान अध्ययन गर्न आवेदन माग गरेको हो। 

पाकिस्तान सरकारबाट नेपाल सरकारलाई प्राप्त हुने पाकिस्तान टेक्निकल एसिस्टेन्स प्रोग्राम(पीटीएपी) अन्तर्गत १९ विद्यार्थीले छात्रवृत्तिमा अध्ययन गर्न पाउने आयोगले जनाएको छ। १९ मध्ये एमबीबीएसतर्फ १०, बीडीएस तर्फ १ र डी. फार्मेसीतर्फ ८ विद्यार्थी पाकिस्तान अध्ययनका लागि जान पाउनेछन्।

योग्यता पुगेका इच्छुक विद्यार्थीले साउन १६ गते अपरान्ह ५ बजेसम्म आवेदन दिनसक्ने आयोगले जानकारी दिएको छ। 

गत चैत्रमा भएको चिकित्सा शिक्षा आयोगको एकीकृत प्रवेश परीक्षा पास गरी योग्यताक्रममा रहेका, कक्षा १२ को परीक्षामा ६५ प्रतिशत भन्दा बढी अंक ल्याएका विद्यार्थीले आवेदन दिनसक्ने छन्।