जर्मनीमा हवाई सेवाका कर्मचारीले तलब नपाएको भन्दै विमानस्थलमा हड्ताल गर्दै

बर्लिन- वेतन वृद्धिको माग गर्दै विमानस्थलमा काम गर्ने कर्मचारीले बुधबार हडताल गर्ने घोषणा गरेसँगै लुफ्थान्साले बुधबार फ्रान्कफर्ट र म्युनिखबाट हुने सबै उडान रद्द गर्न बाध्य भएको बताएको छ। 'ग्राउन्ड स्टाफ’ले गरेको हडतालले एक लाखभन्दा बढी यात्रीलाई असर पारेको छ ।

एयरलाइन्सले फ्रान्कफर्टबाट ६७८ र म्युनिखबाट ३४५ उडान रद्द गर्न बाध्य भएको जनाउँदै मंगलबार फ्रान्कफर्टबाट ३२ र म्युनिखबाट १५ उडान रद्द गर्नुपरेको बताएको छ। लुफ्थान्साले फ्रान्कफर्ट उडान रद्द गर्दा ९२ हजार र म्युनिखको अवरोधले उडान नहुँदा ४२ हजार यात्री प्रभावित हुने बताएको छ। 

एयरलाइन्सले प्रभावितहरूलाई सम्पर्क गर्ने र सम्भव भएसम्म वैकल्पिक उडानको व्यवस्था गर्ने जनाएको छ। यद्यपि उसले वैकल्पिक उडानमा सबैलाई समेट्न सकिने सुनिश्चितता गरेको छैन। उपलब्ध सीटमा यात्रीलाई उनीहरूलाई गन्तव्यसम्म पु¥याउन प्रयास गरिने बताइएको छ। विमान कम्पनीले हडतालका कारण बिहीबार र शुक्रबार उडान रद्द वा ढिलाइ पनि हुनसक्ने जनाएको छ।  

करिब २० हजार कर्मचारीले तलब वृद्धिको माग गर्दै सोमबार एकदिवसीय हडतालको घोषणा गरेका थिए। युरोपभरका विमास्थलमा कर्मचारी अभाव र यात्रीको चाप बढिरहेका बेला लुफ्तान्साका कर्मचारीको हडतालले जटिलता थपेको छ। यात्रीको बढ्दो चापले गर्दा सुरक्षा जाँचमा अवरोध भएको छ भने यात्रीका लामा लाइनले विमानस्थल साघुँरो भएको छ। 

मुद्रास्फीति बढ्दै जाँदा फ्रान्स, स्वीडेन, नर्वे र डेनमार्कमा स्क्यान्डिनेभियन एयरलाइन्सका पाइलटले उच्च तलबको माग गर्दै हडताल गर्दा अन्तिम समयमा उडान रद्द गर्नुपरेको छ भने केही उडानमा लामो विलम्ब मात्र भएको छैन हराएको सामान वा झिटीगुन्टाका लागि धेरै समय प्रतीक्षा गर्नुपरेको छ। यस्तो दृश्यले विमानस्थलमा अराजकता बढेको छनक दिएको छ।