सल्यान- सल्यानस्थित वनगाड कुपिन्डे नगरपालिका-८ बाबियाचौरस्थित कुपिन्डे दहमा पसेका युवा बेपत्ता भएका छन्। बेपत्ता हुनेमा सल्यान कपुरकोट ६ का ३७ वर्षीय वेदबहादुर बस्नेत छन्।
मंगलबार दिउँसो साढे १२ बजेतिर टिकटक बनाउने भन्दै कुपिन्डे दहमा गएका थिए। बस्नेत दहमा पसेर टिकटकका लागि साथीलाई भिडिओ खिच्न लगाएका थिए। केहीबेर भिडिओ खिचेपछि उनी गहिरो भागतिर गएको र फर्किन नसकेको उनीसँगै दह पुगेका उनका साथी मूलबहादुर तामाङले बताए।
घटनास्थल पुगेका प्रहरीमध्ये कोही पनि राम्रो पौडीबाज नभएको हुँदा खोजीका लागि दहमा भने कोही पसेका छैनन्। जिल्ला प्रहरी प्रमुख खड्काले बाहिरी जिल्लाबाट गोताखोर बोलाउनका लागि पहल भइरहेको जानकारी दिए।
कुपिन्डे दहमा २०७५ सालमा पनि एक युवक बेपत्ता भएका थिए। उनी २८ दिनपछि फेला परेका थिए।