सप्तकोशीमा जेटबोट बन्द, इटहरीमा मोटरबोट शुरु

इटहरी- प्रदेश-१ को सप्तकोशी नदीमा व्यावसायिक रूपमा सञ्चालित जेटबोट हाल बाढीका कारण बन्द छ । बराहक्षेत्र जल यातायात तथा पर्यटन प्रालिले सञ्चालन गरेको जेटबोटको अवस्था हेरेर १५ भदौपछि सञ्चालन हुने कम्पनीका प्रबन्ध निर्देशक विमलमान श्रेष्ठ बताउँछन् । 

सप्तकोशीको जेटबोट बन्द भएको मेसोमा इटहरीको पर्यटकीय क्षेत्र तालतलैयामा व्यावसायिक मोटरबोट सञ्चालनमा आएको छ । इटहरी-२ र ३ मा फैलिएको जलाधार क्षेत्र तालतलैयामा गत शनिबारदेखि सञ्चालनमा आएको मोटरबोट १० सिट क्षमताको छ । व्यवस्थापन समितिका अनुसार मोटरबोटले पाँच मिनटसम्म तालतलैयाको फन्को लगाउँछ ।

न्यूनतम चार फिट गहिरो पानीमा कुद्ने मोटरबोट तालतलैयाका लागि उपयुक्त रहेको चालक धनबहादुर पाण्डेले बताए ।

प्रदेश-१ का जलपारखीहरू सप्तकोशी नदीमा जेटबोटमा रम्दै आएका थिए । जेटबोटमा यात्रा एक रुटको दुईतर्फी भाडा १५ सय रुपैयाँसम्म पर्छ । तालतलैयामा एक फन्को मार्ने मोटरबोटका लागि एक सय रुपैयाँ तिरे पुग्छ । 



बाढीका बेला सप्तकोशीको जेटबोट बन्द हुन्छ । तालतलैयामा भने बाह्रमास चलाउन सकिने समितिको भनाइ छ । नेपालमा जलमार्गका सवारी चालकहरूको अभाव छ । सप्तकोशीमा जेटबोट चलाउने चालक पनि दुई जना मात्रै छन् । इटहरीमा भने मोटरबोट चलाउन चार जना चालकको ‘ब्याकअप’ राखिएको छ । 

व्यवस्थापन समिति अध्यक्ष वीरबहादुर लिम्बूका अनुसार कुनै एक चालक काम विशेषले अनुपस्थित हुँदा अभाव नहोस् भनेर चार जना राखिएको हो ।

उद्घाटनको दिन शनिबार ७० जनाले मोटरबोट चढेका थिए । आइतबार पनि ३० जना आएका थिए । इटहरी र धरानका आगन्तुक बढी रहेको समितिको भनाइ छ ।

तालतलैयामा मोटरबोट सञ्चालनसँगै वडाको पर्यटकीय आम्दानी बढ्ने इटहरी-२ का वडाध्यक्ष हर्क मगर बताउँछन् । ताललैया व्यवस्थापन समितिका अनुसार हरेर वर्ष वनभोज र घुमघामका लागि आन्तरिक र बाह्य पर्यटकहरू करिब पाँच लाख जना हुन्छन् । मोटरबोटका कारण पर्यटक संख्या बढ्ने समितिको आकलन छ । समिति अध्यक्ष लिम्बु भन्छन्, ‘नयाँ पर्यटकीय प्रोडक्ट थपिएकाले आगन्तुक संख्या धेरै बढ्नेमा ढुक्क छौं ।’