पाल्पा बस दुर्घटना : ज्यान गुमाउने ६ जनाको सनाखत 

बुटवल- पाल्पामा आइतबार साँझ भएको दुर्घटनामा परि मृत्यु भएका ६ जनाको सनाखत भएको छ।

दुर्घटनामा परि मृत्यु हुनेहरुमा गुल्मी चन्द्रकोट गाउँपालिका ८ मझुवा बस्ने १५ वर्षीय प्रवेश काफ्ले, गुल्मी मुसिकोट नगरपालिका- ७ का ४० वर्षीय लाल बहादुर राना कुमाल रहेका छन्। 

यसैगरी रुपन्देही देवदह नगरपालिका- ७ का ८७ वर्षीया डिलसरी कामी, कपिलवस्तु वाणगंगा नगरपालिका- २ का ४५ वर्षीय सुरज भन्ने यज्ञ बहादुर सोमै, नवलपरासी (पश्चिम) बर्दघाट- ५ का २४ वर्षीया पूर्णिमा कामी र बागलुङ बडिगाड गाउँपालिका- १० का ५५ वर्षीया यमकली थापाको मृत्यु भएको जिल्ला प्रहरी कार्यालय पाल्पाका प्रवक्ता प्रहरी नायव उपरीक्षक वीरेन्द्र थापाले बताएका छन्। 

बागलुङ बुर्तिबाङबाट बुटवल तर्फ जाँदै गरेको लु१ख ५९५२ नम्बरको बस आइतबार साँझ ५ बजेतिर पाल्पाको रिब्दिकोट २ लघुवामा दुर्घटना भएको थियो। दुर्घटनामा परि घाइते भएकाहरु १६ जना मध्ये ८ जना उपचार पश्चात् घर फर्किएको प्रहरीले जनाएको छ।