भारतको ‘अग्निपथ’ योजना गोर्खा भर्ती सन्धि प्रतिकूल : रावल

काठमाडौं– नेकपा एमाले सांसद भीम रावलले भारतले अघि सारेको ‘अग्निपथ’ योजनामा नेपालीलाई लिए गोर्खा भर्ती सन्धि खारेज गर्नुपर्ने बताएका छन्। आइतबारको प्रतिनिधिसभा बैठकको विशेष समयमा बोल्दै सांसद रावलले भारत सरकारको अग्निपथ योजना गोर्खा सैनिक भर्ती सन्धि विपरीत रहेको बताएका हुन्। 

अग्निपथ योजनाअन्तर्गत भारतीय सेनामा सहभागिता हुने गरी ४ वर्षका लागि भर्ना खोलिएको, त्यसरी भर्ती भएकाले जल, स्थल र अकासमा खटाइएको ठाउँमा काम गर्नुपर्ने र सेवामा खटाइएकाले उपदान, महँगी भत्ता तथा अरू सेनाले जस्तो पाउने सुविधा नपाउने उनले दाबी गरे।

चार वर्षका लागि खोलिएको अग्निपथ योजनाअन्तर्गत भर्ती भएकालाई कुनै पनि समय सेवाबाट हटाउन सकिने प्रावधान गोर्खा भर्ती सन्धि विपरीत भएको उनले बताए।गोर्खा भर्ती सन्धिअनुसार भारतीय सेनामा भर्ती हुने नेपालीको हकमा अग्निपथ प्रावधानबारे सरकारले सदनलाई जानकारी दिनुपर्ने माग रावलले गरे।