२ सय युवतीमार्फत् ठगी धन्दा चलाएको आशंका, कल सेन्टरमा प्रहरी छापा

बुटवल- अवैध धन्दा गरेको आशंकामा रुपन्देहीको तिलोत्तमा नगरपालिकाको एक कल सेन्टरमा प्रहरीले छापा मारेको छ। तिलोत्तमा नगरपालिका २ जानकीनगरमा ४ तल्लाको घरमा सञ्चालित कल सेन्टरमा प्रहरीले आइतबार छापा मारेको हो। 

३ वटा फ्ल्याट भाडामा लिई ३ सय कम्प्युटर राखेर काम गर्ने कल सेन्टरमा अवैद्य धन्दा भएरहेको सूचना आएपछि छापा मारिएको रुपन्देहीका प्रहरी प्रमुख रविन्द्र रेग्मीले बताए। 

२ सय भन्दा बढी १८/१९ वर्षका युवती उक्त कल सेन्टरमा कार्यरत रहेको पाइएको छ। सर्वसाधारणलाई म्यासेज पठाई ट्रयापमा पार्ने गरिएको प्रहरीको प्रारम्भिक अनुसन्धानमा खुलेको छ। 

चिनियाँ र भारतीय नागरिकसमेतको लगानीमा खोलिएको उक्त कार्यालयबाट सर्वसाधारणको मोबाइलमा ह्वाट्सप र फेसबुकमा अश्लील म्यासेज पठाउने तथा चिट्ठा पर्‍यो भन्दै ठगी गर्ने गरेको प्रारम्भिक अनुसन्धानका क्रममा खुलेको इलाका प्रहरी कार्यालय बुटवलका प्रमुख प्रहरी नायव उपरीक्षक ठगबहादुर केसीले बताए। सञ्चालक पक्राउ गरेर विस्तृत विवरण सार्वजनिक गर्ने प्रहरीले जानकारी दिएको छ।