प्रदेश २ ले दियो इदको बिदा

जनकपुरधाम- प्रदेश २ को सरकारले बुधबार सार्वजनिक बिदाको घोषणा गरेको छ । 

मुस्लिम धर्मावलम्बीहरुको दोस्रो ठुलो चाड इद-ऊल-जोहा (वकरीद) को अवसरमा प्रदेश सरकारले सार्वजनिक बिदा दिने घोषणा गरेको हो। सोमबार साँझ बसेको मन्त्रिपरिषद बैठकले प्रदेशमा बुधबार सार्वजनिक बिदा दिने निर्णय गरेको मुख्यमन्त्री तथा मन्त्रिपरिषद कार्यालयले जनाएको छ ।

यसैगरी मन्त्रिपरिषदको बैठकेले तीनवटा विधेयक पारित गरेको छ भने १५ वटा विधेयकलाई सैद्धान्तिक सहमति प्रदान गर्ने निर्णय समेत गरेको छ । मन्त्रिपरिषदले मदरसा शिक्षा बोर्ड गठनसम्बन्धी विधेयक, कानून निर्माण प्रक्रियासम्बन्धी विधेयक र प्रदेशसभा सचिव नियुक्तिसम्बन्धी विधेयक पारित गरेको हो ।

बैठकले भौतिक पूर्वाधार विकास मन्त्रालय सम्बन्धी पाँच, भूमि व्यवस्था, कृषि तथा सहकारी मन्त्रालयसम्बन्धी नौ र आन्तरिक मामिला तथा कानूनमन्त्रालय सम्बन्धी एक विधेयकलाई सैद्धान्तिक सहमति प्रदान गरेको मुख्यमन्त्री तथा मन्त्रिपरिषद कार्यालयले जनाएको छ ।