प्रदेशमा बिदा विवाद : सरकारले दिने, प्रशासनले नमान्ने

इटहरीः प्रदेश १ को मंगलबार बिहान बसेको मन्त्रिपरिषद बैठकले भदौ ६ गते बुधबार बकर इदको अवसरमा बिदा दिएको छ । बिदा बारेमा मन्त्रिपरिषदको बैठकले निर्णय गरेको मुख्यमन्त्री शेरधन राईका प्रेस सल्लाहकार धु्रव सुवेदीले बताए । सुवेदीका अनुसार मन्त्रिपरिषदको निर्णय सबै प्रदेशमा रहेका सरकारी तथा निजी कार्यालयहरुलाई जानकारी गराइने छ । 

एकै महिनामा तीन सार्वजनिक बिदा

भदौ ६ गते मुस्लिम धर्मवलाम्बीहरुको पवित्र पर्व बकर इदको बिदा दिएको प्रदेश सरकारका भदौमा यो सहित तीन बिदा परेका छन । प्रदेश १ को आन्तरिक मामिला तथा कानुन मन्त्रालयले बिदा सम्बन्धमा गत श्रावण २१ गते लेखेको पत्रका अनुसार भदौ १० र भदौ १८ गते पनि प्रदेशमा बिदा दिइएको छ । भदौ  १० गते ऋषितर्पिणि, रक्षाबन्धन, जनै पुर्णिमाको अवसरमा बिदा दिएको छ । यस्तै, भदौ १८ गते प्रदेश सरकारले राधाकृष्ण रथयात्राको लागी भन्दै मोरङ र सुनसरीमा बिदा दिने निणर्य गरेको छ । 

पत्र नआई जिल्ला प्रशासनले बिदा नदिने

प्रदेश १ सरकारले साउन २४ गते विश्व आदिवाशि दिवशको अवसरमा पहिलो प्रदेश बिदा दिएको थियो । बिदाको पालना उच्च अदालत, जिल्ला अदालतदेखि जिल्ला प्रशासन कार्यालय हुँदै बैंक तथा वित्तिय संस्थाहरुले कार्यान्वयन गरेनन् । 

अख्तियार, कृषि, पशु जस्ता सबै क्षेत्रीय कार्यालयहरुले पनि प्रदेश सरकारले निर्णय गरेको पहिलो बिदा मानेनन् । 

बिदा नमान्ने सरकारी कार्यालयले आफूहरुलाइ संघीय सरकारले जानकारी नगरेकाले नमानेको बताएका थिए। इदको बिदामा पनि प्रदेश सरकारले बिदाको आधिकारितासहितको पत्र जिल्ला प्रशासनमा नआएसम्म मातहतका निकाय बिदा नहुने जनाएको छ । 

निजी तथा सरकारी बैंक तथा वित्तिय संस्थाहरुले भने नेपाल राष्ट्र बैंक र आफ्नो केन्द्रिय कार्यालयबाट बिदा बारेमा कुनै सूचना नआएकाले बिदाको विषयमा निर्णय नलिएको बताएका छन् । 

सरकारी तथा निजी विद्यालय र स्थानीय तहले मात्रै अघिल्लो प्रदेश बिदा मानेका थिए ।