माओवादीमा किन कठिन बन्दैछ पदाधिकारी चयन?

काठमाडौं- गत पुसमा राष्ट्रिय सम्मेलनका रुपमा सुरु भएको ‘भेला’लाई उद्घाटनपछि नेकपा माओवादी केन्द्रले महाधिवेशनमा परिणत गरेको थियो। आठ दिनसम्म चलेर १८ पुसमा सम्पन्न महाधिवेशनले अध्यक्षबाहेकका पदाधिकारी, स्थायी कमिटी र पोलिटब्युरोको टुंगो लगाउने जिम्मा अध्यक्ष प्रचण्डलाई सुम्पिएर सकिएको थियो। 

महाधिवेशन सकिएको ६ महिना पुगिसक्दा पनि सबै पदाधिकारीको टुंगो माओवादीले लगाउन सकेको छैन। ठूलो सकसपछि गएको बिहीबार भने काठमाडौंमा बसेको पार्टीको केन्द्रीय कमिटी बेठकले दुई उपाध्यक्षको नाम टुंग्याएपनि महासचिव टुंगो लगाउनु पार्टीलाई फलामको च्युरा भएको छ। बैठकले पार्टीको उपाध्यक्षमा नेता नारायणकाजी श्रेष्ठ र कृष्णबहादुर महरालाई चयन गरेको थियो।

सोही दिन १२५ जना सदस्य र ३१ जना वैकल्पिक सदस्यसहितको १५६ सदस्यीय पोलिटब्युरो गठन गरिएको छ। ४१ सदस्य पुर्‍याउने भनिएको स्थायी कमिटीमा १५ जनाको नाम मात्रै राखिएको छ। 

माओवादीको विधानअुनसार एक अध्यक्ष, एक वरिष्ठ उपाध्यक्ष, ६ उपाध्यक्ष, एक महासचिव, दुई उपमहासचिव, तीन सचिव र एक कोषाध्यक्षसहित २ सय ९९ केन्द्रीय कमिटी निर्वाचित हुनुपर्छ। तर, दुई उपाध्यक्षबाहेक महासचिवसहित अन्य पदाधिकारीको टुंगो माओवादीले लगाउन सकेको छैन।

सोही दिन १२५ जना सदस्य र ३१ जना वैकल्पिक सदस्यसहितको १५६ सदस्यीय पोलिटब्युरो गठन गरिएको छ। ४१ सदस्य पुर्‍याउने भनिएको स्थायी कमिटीमा १५ जनाको नाम मात्रै राखिएको छ। 

हुन त उपाध्यक्ष चयनको काम पनि प्रचण्डको लागि सहज भएको थिएन। नारायणकाजी श्रेष्ठलाई वरिष्ठ उपाध्यक्ष चयन गर्ने विषय आउँदा पार्टीभित्रैबाट विरोध भएको थियो। हालै सम्पन्न केन्द्रीय कमिटीको बैठकमा पनि प्रचण्डले भनेका थिए, ‘वरिष्ठ उपाध्यक्षमा त नारायणकाजीको विकल्प को छ र? खगराजजीले पढ्नुहुन्छ, मातृकाजीले विरोध गरिहाल्नुहुन्छ।’ यसरी पदाधिकारी चयनको लामो पीडाबाट गुज्रिएका प्रचण्डले अन्तत: दुई उपाध्यक्षको टुंगो लगाए। 

बाँकी पदाधिकारीको नाम टुंग्याउन प्रचण्डलाई सहज छैन। महासचिव चयनको विषयमा प्रचण्ड प्रवेश गर्न चाहेकै छैनन्। माओवादी नेताहरुकाअनुसार महासचिवमा विवाद देखिएकोले नै पदाधिकारी चयनमा ढिला भइरहेको हो।