जनकपुरको अर्को परिचय गंगा आरती

जनकपुरधाम- धार्मिक र सांस्कृतिक शहर हो, जनकपुरधाम । सोही कारण हालै संघीय मामिला तथा स्थानीय विकास मन्त्रालयले जनकपुरको नाम परिवर्तन गरेर धाम थपेको छ ।

नामअनुसार नै पवित्र बन्ने बाटोमा अगाडि बढ्ने प्रयासमा छ, जनकपुरधाम । यहाँको धार्मिक र सांस्कृतिक आस्थामा बल पुर्‍याउन सहयोग गर्दै आइरहेको छ, दैनिक साँझमा हुने गंगा आरतीले ।

जनकपुरको धार्मिक तथा ऐतिहासिक पोखरी गंगासागरमा हरेक साँझ आरती आयोजना हुन्छ । र, त्यसको आनन्द लिन स्थानीय बासिन्दाका साथै बाहिरबाट आएका पर्यटकहरू त्यहाँ पुग्ने गर्छन् । खासगरी, जनकपुर घुम्न आएका आन्तरिक तथा बाह्य पर्यटकहरूलाई गंगा आरतीले लोभ्याएको पाइन्छ । गंगा आरती शुरु भएपछि फोहोर र दुर्गन्धित रहँदै आएको गंगासागर पोखरी पनि अहिले सफा छ ।

पोखरीको सरसफाइ अभियानबाट थालिएको गंगा आरतीले चार वर्ष पूरा गरेको छ । चार वर्षअघि गंगा दशहराको अवसर पारेर शुरु भएको आरतीको समयमा गंगासागरमा भीड जम्मा हुन्छ । 

छिमेकी मुलुक भारतका राजनीतिज्ञ, विशिष्ट पाहुनाका साथै नेपालका विशिष्ट व्यक्तिहरू समेत यहाँ आएका बेला आरतीमा रमाउने गरेको ‘सेभ हिस्टोरिकल जनकपुर’का संयोजक तथा प्रदेशसभा सदस्य रामआशिष यादव बताउँछन् ।

भारतको हरिद्वार, बनारसलगायत स्थानमा जस्तै जनकपुरको गंगासागरमा हुने गंगाआरतीमा समेत पर्यटकहरू रमाउने गरेको उनी बताउँछन् । 

आरतीका क्रममा गंगास्तुती मात्र नभई सबै देवी-देवताको मन्त्र जाप गरिन्छ । सोही कारण यसको महत्व विशेष बनेको स्थानीय मनोज झा बताउँछन् । गंगा आरतीमा सहभागी भए दिनभर गरिएका भुलहरूबाट क्षमा पाइने जनविश्वास छ ।

यसको थप प्रबद्र्धनका लागि राज्यको तर्फबाट आवश्यक सहयोग हुन नसकेको स्थानीय बासिन्दा बताउँछन् । गंगा आरतीको प्रचारप्रसार सरकारी निकायबाट हुन नसक्नु दुःखद् रहेको उनीहरूको भनाइ छ ।

जनकपुरको गंगा आरती अन्य स्थानका लागि प्रेरणासमेत बनेको छ । यहाँ आरती शुरु भएपछि महोत्तरी सदरमुकाम जलेश्वरमा दैनिक शिव आरती र सिरहा सदरमुकाममा समेत यस्तै आरती शुरु भएको छ ।