म्याग्दीका कृषकले चार लाख ६० हजार राहत पाए

म्याग्दी- वन्यजन्तुको आक्रमणबाट पशुधनको क्षति बेहोरेका म्याग्दीका कृषकले चार लाख ६० हजार राहत पाएका छन्।

डिभिजन वन कार्यालय म्याग्दीले आर्थिक वर्ष २०७८/०७९ मा सो रकम बराबरको राहत वितरण गरेको जनाएको छ। निमित्त डिभिजनल वन अधिकृत मनोज रानाभाटले चितुवाको आक्रमणबाट मरेका ५० वटा पशुका धनीलाई राहत उपलब्ध गराइएको जानकारी दिए। 

'प्रदेश सरकारको कार्यविधिअनुसार ३७ वटा खसी, बाख्रा र बोका, सात वटा पाठापाडी र छवटा बङ्गुरको राहत वितरण गरेका हौँ', उनले भने, '३० जना कृषकले राहत पाउनुभएको छ।' बाख्रा, खसी र बोकाको दश हजार, पाठापाडीको तीन हजार र बङ्गुरको छ हजार पाँच सय का दरले राहत वितरण गरिएको हो। चितुवाको आक्रमणबाट सबैभन्दा बढी क्षति बेहोर्ने कृषक मङ्गला गाउँपालिकाका छन्। 

वन्यजन्तु पीडित कृषकलाई राहतका अतिरिक्त मानव-वन्यजन्तु द्वन्द्व व्यवस्थापनका ब्रोसर वितरण र सचेतनामूलक गोष्ठी गरिएको छ। वन्यजन्तुको उपभोगका लागि दशवटा सामुदायिक वनमा पोखरी निर्माण गरिएको सहायक वन अधिकृत नरबहादुर क्षेत्रीले जानकारी दिए।