एमालेबाट निर्वाचित काठमाडौं- ४ का वडाध्यक्षविरुद्ध पक्राउ पुर्जी

काठमाडौं- नेकपा एमालेबाट निर्वाचित भएका काठमाडौं महानगरपालिका वडा नं. ४ का वडाध्यक्ष दिनेश महर्जनविरुद्ध पक्राउ पुर्जी जारी भएको छ।

जिल्ला अदालत काठमाडौंले वडाध्यक्ष महर्जनसहित ३ जनालाई पक्राउ गरी हिरासतमा राखेर अनुसन्धान गर्न आदेश दिएको छ। 

वरिष्ठ ज्येष्ठ नागरिक महानगर प्रोत्साहन भत्ता बापत उपलब्ध गराउनुपर्ने रकममा अनियमितता गरेको अभियोगमा मुद्दा परेपछि अदालतले महर्जनसहित तीन जनालाई हिरासतमै राखी अनुसन्धान गर्ने आदेश दिएको हो।

अदालतले जारी गरेको आदेशमा वडाध्यक्ष महर्जनसहित ध्रुवप्रसाद त्रिपाठी र मोहनबहादुर विष्टविरुद्ध सरकारी कागजात कीर्ते गरेको र लिखतसमेत कीर्ते गरेको अभियोगमा ७ वर्ष कैद सजायसहितको मागदाबी गरिएको छ। सो मागदाबी पछि जिल्ला अदालत काठमाडौंले तीनै जनालाई पक्राउ गरी हिरासतमै राखेर अनुसन्धान गर्न उल्लेख गरिएको छ। 

महानगरीय प्रहरी वृत्त महाराजगञ्जलाई दिएको पक्राउ पूर्जी प्राप्त भएपछि फौजदारी कार्यविधि संहिता, २०७४को दफा ५८ (३) नम्बर बमोजिम प्रतिवादीहरु रहे भएको वा रहन बस्‍नसक्ने इलाकाको प्रहरीसँग समन्वय गरी निज प्रतिवादीहरु दिनेश महर्जन, ध्रुवप्रसाद त्रिपाठी, र मोहनबहादुर विष्टलाई पक्राउ गरी अदालतमा उपस्थित गराउन आदेश दिएको छ।