निर्माणाधीन पुलका कारण धोवीखोलामा बाढी : सिंह

काठमाडौं- नेपाली कांग्रेसका नेता प्रकाशमान सिंहले राजधानीको बिजुलीबजारस्थित धोवीखोलामाथि निर्माणाधीन पुलले बाढी निम्त्याएको बताएका छन्।

प्रतिनिधिसभाको बुधबारको बैठकमा विशेष समयमा सिंहले भने, ‘निर्माणाधीन पुलले धोवीखोलाको बहावलाई रोकेका कारण बस्तीमा बाढी पसेर दर्जनौं घरलाई क्षति पुगेको छ।’ 

उनले बाढीको कारण धोविखोलामा माटो थुप्रिएको र सरकारी निकायले त्यसको निकासको लागि एकले अर्कोलाई दोष थोपरेर बसेका कारण जनताले दु:ख पाइरहेको भन्दै क्षतिपूर्ति माग गरे।
 
सिंहले काठमाडौंको १ नम्बर क्षेत्रको धोवीखोलामा आएको बाढीले  महानगरको १०, ११ र २९  वडाका खोलाछेउका अधिकांश घरको तल्लो तलामा धेरै क्षति पुर्‍याएको जानकारी दिए। 

देवीनगर र जागृतिनगर बाढी र हिलो पस्दा त्यस क्षेत्रका कटेज इन्डस्ट्रिज, छापाखाना आदिमा क्षति पुर्‍याएको उनले जनाए। सिंहले भने, ‘नदीनाला सफाइ गर्न उपाय खोज्नुपर्‍यो भन्दा धोवीखोला करिडोर, वागमती सभ्यता विकास समिति, काठमाडौं उपत्यका र सडक विभागले एकले अर्कोलाई दोष दिएर काम नगरेको आरोप लगाए। 

सरकारी एउटा निकायले अर्कोलार्इ दोष दिएर विकास नहुने बताउँदै तत्काल क्षतिपूर्तिका लागि उनले सरकारसँग माग गरे।