नेपालले दियो भुटानलाई ९५ रनको लक्ष्य

काठमाडौं– एसीसी महिला टी–ट्वान्टी च्याम्पियनसिपअन्तर्गत नेपालले भुटानलाई ९५ रनको लक्ष्य दिएको छ। 

मलेसियाको यूएसडी यूकेएम ओभलमा टस जितेर पहिले ब्याटिङ रोजेको नेपालले निर्धारित २० ओभरमा ९ विकेट गुमाउँदै ९४ रन बनाएको छ।

नेपालका लागि काजोल श्रेष्ठले सर्वाधिक २६ रनको योगदान गरिन् । कप्तान रुविना क्षेत्रीले २१ रन बनाउँदा इन्दु बर्माले २० रन जोडिन्। 

नेपालका लागि त्यसबाहेकका ब्याटरले दोहोरो अंकमा रन बनाउन सकेनन्। नेपालका तीन जना ब्याट्र रन आउट भए।

भुटानका लागि अन्जु गुरुङ, सोनाम पाल्डोम र टासी चेकीले एक–एक विकेट लिए। नेपाल भुटानलाई हराउँदै च्याम्पियनसिपमा जितको सुरुआत गर्न चाहन्छ। 

च्याम्पियनसिपमा १० टोलीको सहभागिता छ। सहभागी टोलीलाई दुई समूहमा विभाजन गरिएको छ।

समूह चरणको खेलपछि शीर्ष दुई टोलीले सेमिफाइनलमा स्थान बनाउनेछन्। च्याम्पियनसिपको फाइनल पुग्ने दुई टोली महिला टी–ट्वान्टी एसिया कप क्रिकेटमा छनोट हुनेछ ।