एसियन कप : इन्डोनेसियासँग नेपालको लज्जास्पद हार

काठमाडौं- एसियन कप छनोटको तेस्रो चरणको खेलमा नेपालले इन्डोनेसियासँग ७-० को हार बेहोरेको छ। कुवेतमा मंगलबार राति सम्पन्न भएको खेलमा नेपालले लज्जास्पद हार बेहोरेको हो।

१० सिनियर खेलाडीलाई टिमबाहिर राखेर प्रशिक्षक अब्दुल्लाह अलमुताइरीले बनाएको नयाँ टिमले यसअघि भने २-० र ४-१ को हार बेहोरेको थियो।

कुवेत भ्रमणका दौरान नेपालका दर्शन गुरुङले मात्र गोल गर्न सके। उनले कुवेतविरुद्ध इन्ज्युरी समयमा गोल गरेका थिए।

मंगलबार रातिको अन्तिम खेलमा भने नेपालले सात गोल बेहोर्दा इन्डोनेसियाका वितान सुलेमानले दोहोरो गोल गरेका थिए। त्यसबाहेक डिमस ड्राजडले पनि गोल गरेका थिए। डिमसले खेलको छैटौं मिनेटमा गोल गर्दै इन्डोनेसियालाई अग्रता दिलाएका थिए।

पहिलो हाफमा नेपाले दुई गोलको मात्र सामना गरेको थियो। दोस्रो हाफमा फछ्रिद्दिन अर्यन्टो, सादिल रमदानी, एल्कन बागोट र मसेलिनो फर्डिनाले गोल गरेका थिए।

यससँगै नेपालले ७-० को हार बेहोरेको हो। नेपालले यो छनोटको दौरान १३ गोल बेहोरेको छ भने एक गोल मात्र गर्न सफल भएको छ।