काठमाडौं- १९ औं एशियाली खेलकुदको तयारीमा रहेको कबड्डी टोलीलाई राष्ट्रिय खेलकुद परिषदका सदस्य सचिव टंकलाल घिसिङले राखेपमा सोमबार शुभकामनासहित विदाइ गरेका छन्।
उनले महेन्द्रनगरमा हुने एक महिने प्रशिक्षणका लागि कबड्डी टोलीलाई सोमबार काठमाडौंबाट विदाइ गरेका हुन्।। १५ खेलाडी र ४ प्रशिक्षक सहित १९ जनाको टिम आजै त्यस तर्फ प्रस्थान गरेका छन्।
विदाई गर्ने क्रममा सदस्य सचिव घिसिङले यो प्रशिक्षणमात्र नभई बन्द प्रशिक्षणकै प्रकृया भएको बताए। उनले यो प्रशिक्षण ९ औं राष्ट्रिय खेलकुदका लागि सुरुवाती प्रशिक्षण समेत रहेको भन्दै एशियाली खेलकुदको मिति तय नभएता पनि खेलाडीहरुको स्तर वृद्धि गर्न यस कार्यक्रमले सहयोग पुग्ने बताए।
सदस्य सचिव घिसिङले खेलाडीहरुलाई अनुशासित रहेर प्रशिक्षण लिन र स्तर वृद्धिका लागि अध्ययन र अनुसन्धानलाई पनि महत्व प्रदान गर्न प्रशिक्षक र खेलाडीलाई सुझाव दिए।
राष्ट्रिय खेलकुद परिषदले १९ औं एशियाली खेलकुदमा सहभागी हुने २३ खेलका पहिलो चरणमा छनोट भएका खेलाडीहरुका लागि पहिलो चरणको प्रशिक्षण कार्यक्रम सुरु गरेको छ।