रुकुम पूर्वमा ट्रयाक्टर दुर्घटना, दुई जनाको मृत्यु

काठमाडौं- रुकुम पूर्वमा ट्रयाक्टर दुर्घटना हुँदा दुई जनाको ज्यान गएको छ। जिल्लाको सिस्ने गाउँपालिका–४ स्थित दादीङमा ट्रयाक्टरमा सवार २ जनाको ज्यान गएको प्रहरीले जनाएको छ। 

वडा नम्बर ४ कै कोम्बोटबाट गिट्टी लोड गरेर दादीङतर्फ आउँदै गरेको रा१त १६१६ नम्बरको ट्रयाक्टरमा सवार २ जनाको शुक्रवार साँझ दादीङ रोडमा ज्यान गएको जिल्ला प्रहरी कार्यालय रुकुम पूर्वले जानकारी दिए।

मृत्यु हुनेमा सिस्ने–४ दादीङकै १५ वर्षका आकाश बुढा र सोही ठाउँकै ५० वर्षीया नन्दी बुढा रहेको जिल्ला प्रहरी कार्यालय रुकुम पूर्वका प्रहरी निरीक्षक एवं सूचना अधिकारी कृष्ण खत्रीले जानकारी दिए। उनका अनुसार २ जना घाइते भएका छन्।

घाइतेको रुकुम पूर्व अस्पतालमा उपचार भइरहेको प्रहरी निरीक्षक खत्रीले बताए। चालकको भने नाम ठेगाना नखुलेको र फरार रहेको प्रहरीले बताएको छ। घटनाको अनुसन्धान भइरहेको प्रहरीले जनाएको छ।