आजका अखबारः बलात्कार बढ्यो, बनेन फास्ट ट्रयाक अदालत

काठमाडौं- राजधानीबाट प्रकाशित आइतबारका राष्ट्रिय दैनिक अखबारहरुले विविध विषयका खबरलाई पहिलो प्राथमिकतामा पारेका छन् । 

कसैले डा गोविन्द केसी र प्रधानमन्त्री केपी ओलीबीच भएको भेटलाई पहिलो प्राथमिकतामा पारेका छन् भने कसैले बलात्कारको घटना बढेको र न्याय पाउन ठूलो सकस रहेको विषयलाई मुख्य समाचार बनाएका छन् ।

आजको नयाँ पत्रिका दैनिकले पहिलो पृष्ठको आधा भाग महिलामाथिको अपराधका विषयमा  छिटो न्याय दिन बनाइने भनेको फस्ट ट्रयक अदालत अझै नबनेको विषयमा खर्चिको छ । उसले 'सर्वोच्चको दशक पुरानो ऐतिहासिक परमादेश : तर, महिलामाथिको अपराध हेर्न खोइ फास्ट ट्रयाक अदालत ?' शीर्षकमा खबर लेखेको छ ।

सर्वोच्चले महिलामाथिको अपराध अनुसन्धान गर्न महिला प्रहरी, पैरवी गर्न महिला वकिल र फैसला गर्न महिला  न्यायाधीश राख्न परामादेश दिएको थियो । तर, महिलामन्त्री थममाया थापा भन्छिन्- 'यस्तो जानकारी छैन्, के हो बुझ्न सकिन्छ ।' प्रहरी भन्छ- 'हामी बोल्न मिल्दैन् । '

सिक्टा सिँचाइ आयोजनाको मूल नहर सयभन्दा धेरै ठाउँमा भत्किएको विषयलाई मुख्य समाचार बनाएको आजको नागरिक दैनिकले भने बलात्कारको घटना बढेको विषयलाई दोस्रो प्राथमिकतामा पारेको छ । समाचारमा जनाइए अनुसार बलात्कारका घटनाको अधिकांश पीडक आफन्त र चिनजानका नै हुने गरेका छन् । 

यसैगरि आजको कान्तिपुर दैनिक र अन्नपूर्ण पोस्ट्ले भने प्रधानमन्त्री ओली र डा केसीबीच भएको भेटवार्तालाई प्राथमिकताका साथ छापेका छन् । नागरिक दैनिकले भने दुईबीचको भेटलाई दोस्रो प्राथमिकतामा पारेको छ ।

भेटमा ओलीले मेडिकल शिक्षाको नेतृत्व लिन डा केसी समक्ष प्रस्ताव गरेका थिए भने डा केसीले आफूले नेतृत्व नलिने बताएका थिए । भेटमा प्रधानमन्त्री ओलीले केसीसंग भएको सम्झौता अक्षरसः पालना गर्ने बचन दिएको आजको नागरिक दैनिकले लेखेको छ। 

अन्नपूर्णले ठूला दल उल्झनमा शीर्षकमा मुख्य प्राथकिताका साथ छापेको छ । समाचारमा जनाइएअनुसार नेकपाको एकता तलैसम्म पुग्न सकेको छैन् भने कांग्रेसलाई संघीतामा जान नै सकस भएको छ । 

कान्तिपुरले प्रदेशमा केन्द्रकै खटनपटन रहेको, अब फौजदारी अपराधपीडितले क्षतिपूर्ति पाउने विषयलाई महत्वका साथ छापेको छ । जबर्जस्ती करणी पीडितलाई सामाजिक, सांस्कृतिक, पारिवारिक प्रतिष्ठा वा सम्बन्धमा परेको प्रभावको मूल्यांकनका आधारमा क्षतिपूर्ति भराइने कान्तिपुरले लेखेको छ ।