१ लाख १० हजार राशिको समाजसेवा पुरस्कार रुपन्देहीका पत्रकार पहाडीलाई

बुटवल– मानव अधिकार तथा शान्ति समाजले कर्मयोगी बद्री पहाडी समाजसेवा पुरस्कार–२०७८ रुपन्देहीका अधिकारकर्मी विनोद पहाडीलाई प्रदान गर्ने भएको छ। समाजको काठमाडौंमा सम्पन्न केन्द्रीय समिति बैठकले पहाडीलाई पुरस्कार दिने निर्णय गरेको हो।

२०७९ मंसिरमा अन्तर्राष्ट्रिय मानव अधिकार दिवसको अवसरमा आयोजना गरिने कार्यक्रममा पहाडीलाई १ लाख १० हजार पुरस्कार राशि र सम्मानपत्रसहित पुरस्कृत गरिने समाजका केन्द्रीय सभापति गोबिन्द खनालले जानकारी दिए।

संविधानसभा सदस्य समेत रहेका पहाडी डा. भिमराव अम्वेडकर अवार्डबाट समेत सम्मानित भएका छन्। २०४६ सालदेखि पत्रकारिता क्षेत्रमा संलग्न पहाडी नेपाल राष्ट्रिय दलित पत्रकार संघको संस्थापक अध्यक्ष, नेपाल पत्रकार महासंघको पूर्व केन्द्रीय सदस्य एवं पत्रकार महासंघ रुपन्देही शाखाको दुई कार्यकाल अध्यक्ष भएर काम गरेका थिए ।  

पिता रामबहादुर नेपाली र आमा सोभी नेपालीका पुत्र विनोद पहाडीको जन्म २०२८ साल वैशाख ६ गते पाल्पाको भुवनपोखरीमा भएको थियो। हाल बुटवल, रुपन्देही निवासी पहाडी २०४६ सालदेखि पत्रकारिता क्षेत्रमा संलग्न छन्।