जहाज दुर्घटनाप्रति स्तब्ध छौं : तारा एयर

काठमाडौं-  तारा एयरले दुर्घटनाग्रस्त अवस्थामा जहाज भेटिएकोप्रति स्तब्ध भएको जनाएको छ। सोमबार एक विज्ञप्ति जारी गर्दै तारा एयरले जहाज दुर्घटनाग्रस्त अवस्थामा फेला परेको भन्दै दु:ख व्यक्त गरेको हो।

आइतबार बिहान पोखराबाट जोमसोम उडेको तारा एयरको ९ एन एईटी जहाज मुस्ताङको घोडेपानीबाट जोमसोम टावरसँग अन्तिमपटक सम्पर्क  भएको थियो।

तारा एयरले जहाज दुर्घटनाग्रस्त अवस्थामा १४ हजार ५०० फिटको उचाइमा मुस्ताङको थासाङ गाउँपालिका वडा नम्बर २ को सानुसरे भीरमा भेटिएको जनाएको छ। जहाजमा ३ जना चालक दलका सदस्य र १९  यात्रु गरी २२ जना थिए।

सोमबार बिहानैदेखि हवाई तथा स्थलमार्गबाट खोजी गर्दा जहाज दुर्घटनाग्रस्त अवस्थामा भेटिएको हो। 

विमान दुर्घटनास्थलमा पुगेर नेपाली सेना र स्थानीयको टोलीले उद्धार कार्य सुरु गरेको छ। दुर्घटनामा परी मृत्यु भएकाहरूको उद्धारका लागि तीन जना नेपाली सेना र चार जना स्थानीयको टोलीले उद्धार कार्य सुरु गरेको हो।

घटनास्थलमा उनीहरूलाई उतारेपछि उद्धार तथा शव संकलन थालिएको छ। उद्धारमा जुटेकाले घाइतेहरूको खोजी गरे पनि कसैलाई नभेटेकोको बताएका छन्।