विराटनगर- उदयपुरको कटारी नगरपालिका–१४ भदौरेस्थित चनौटे खोलानजिक सोमबार बिहान ट्रक दुर्घटना हुँदा चार जनाको मृत्यु भएको छ।
मकवानपुरको हेटौंडाबाट हाइड्रोपावरको सिमेन्ट लोड गरेर सोलुखुम्बुतिर जाँदै गरेको ना ८ ख ८२९७ नम्बरको लोबेड ट्रक शिद्धिचरण लोकमार्गअन्तर्गत कच्ची सडकखण्डमा बिहान २:३० बजेतिर दुर्घटनामा परेको हो।
दुर्घटनामा ट्रकका चालक बाराको सिमरा-१ का ३५ वर्षीय सुजित घलान, सहचालक २५ वर्षीय नितेश खड्का, ट्रकमा सवार सिमरा-१ का १७ वर्षीय अनुज लामा र ३७ वर्षीय राजन तामाङको घटनास्थलमै मृत्यु भएको प्रदेश १ ट्राफिक प्रहरी प्रमुख एसपी बासुदेव खतिवडाले जानकारी दिए। उनका अनुसार चालक निदाएका कारण दुर्घटना भएको पाइएको छ।
घटनास्थलबाट शव उठाएर पोस्टमार्टमका लागि लैजाने तयारी भइरहेको एसपी खतिवडाले बताए।