लेतेका वडाध्यक्ष भन्छन् – मिडियाले जहाज यतै दुर्घटना भयो भन्छ, तर केही पत्तो लाग्न सकेको छैन

काठमाडौं– दुई घण्टादेखि सम्पर्कविहीन अवस्थामा रहेको तारा एयरको जहाज मुस्ताङको लेते क्षेत्रमा दुर्घटना भएको आशंका भइरहेको छ। लेते थासाङ गाउँपालिकाको वडा नम्बर ३ मा पर्छ।

हामीले यसबारे बुझ्न लेतेमा पर्ने वडा नम्बर ३ का अध्यक्ष हरि प्रसाद गौचनसँग सम्पर्क गर्दा उनले अहिलेसम्म यसबारे यकिन केही खुल्न नसकेको बताए । ‘मिडियातिर यतै दुर्घटना भयो भन्ने खबर आइरहेको छ तर हामीले अहिलेसम्म केही थाहा पाउन सकिरहेका छैनौं,’ वडाध्यक्ष गौचनले भने, ‘वरिपरि सबै मान्छेहरुलाई फोन गरिरहेका छौं। त्यता दुर्घटनाबारे केही आवाज सुन्यौं भनेर पनि सोधिरहेका छौं। तर, कसैले त्यस्तो पत्तो पाएको बताएका छैनन्।’

त्यहाँ अहिले बाक्लो कुहिरो लागेका कारण टाढाको दृश्य देख्न पनि समस्या रहेको उनले बताए। पोखराबाट जोमसोमका लागि उडेको  जहाज करिब १० बजे पोखराबाट उडेको थियो। अझै सम्पर्कमा आएको छैन।

तारा एयरको पोखराबाट जोमसोम उडेर सम्पर्कविहीन भएको नाइन एन एईटी जहाज बिहान १०ः७ बजेसम्म शिख नजिकको आकाशमा रहँदासम्म सम्पर्कमा रहेको देखिन्छ। सम्पर्क विहीन भएको जहाजमा चालक दलका ३ जना सदस्य, १३ नेपाली, ४ भारतीय र दुई जर्मन नागरिक गरी १९ जना सवार छन्।

यसैबीच, नेपाल नागरिक उड्ययन प्राधिकरणले तारा एयरको जहाज अहिलेसम्म बेपत्तै रहेको उल्लेख गरेको छ। प्राधिकरणले दुर्घटनाको पुष्टि गरेको छैन।

प्राधिकरणका अनुसार विमान अन्तिम पटक जोमसोम टावरसँग १०ः७ बजे घोडेपानी भन्ने स्थानमा सम्पर्कमा आएको थियो र त्यसपछि सम्पर्कविहीन भएको थियो।