सिकार खेल्न गएका एक जनाको गोली लागेर मृत्यु, आठ जना पक्राउ

दाङ- दाङमा सिकार खेल्ने क्रममा गोली लागेर एक जनाको ज्यान गएको छ।

जिल्लाको बंगलाचुली गाउँपालिका-८ रानीखुट्टीको जंगलमा शुक्रबार दिउँसो करिब १२ सिकार खेल्न गएका एक जनाको आफैले बोकेको बन्दुकको गोली लागेर ज्यान गएको हो। आफैले बोकेको बन्दुक आफ्नै निधारछेउको भागमा पट्किँदा उनको घटना स्थलमै मृत्यु भएको प्रहरीले जनाएको छ।

मृत्यु हुनेमा लमही-१ वसन्तपुर निवासी २३ वर्षीय कालुराम घर्तीमर रहेका छन्। वडा प्रहरी कार्यालय लमहीका अनुसार सिकर खेल्न बारुद भरिएको बन्दुक भिरेर लस्करै हिँडेको बेला पट्किएको हो। प्रहरीले घटनाबारे अनुसन्धान थालेको जनाएको छ।

सिकार खेल्न प्रयोग भएका चार नाल भरुवा बन्दुकसहित आठ जनालाई पक्राउ गरिएको प्रहरीको भनाइ छ।

पक्राउ पर्नेमा लमही-१ वसन्तपुर निवासी ४० वर्षीय जीवलाल घर्तीमगर, सोही ठाउँका ४५ वर्षीय बुद्धिमान घर्तीमगर, ५० वर्षीय ओमबहादुर घर्तीमगर, २८ वर्षीय मृतकका दाइ मिनबहादुर घर्तीमगर, दिलबहादुर घर्तीमगर र खगेन्द्र घर्तीमगर रहेका छन्।