सर्वोच्चले उल्ट्यायो पूर्वडीआईजी रञ्जन कोइरालाको कैद घटाउने आफ्नै आदेश

काठमाडौं– श्रीमतीको हत्या गरेर जेल परेका सशस्त्र प्रहरीका पूर्वडीआईजी रञ्जन कोइरालाको सजाय घटाउने गरी भएको यसअघिको फैसला सर्वोच्च अदालतले उल्ट्याइदिएको छ।

निलम्बित प्रधानन्यायाधीश चोलेन्द्रशमशे जबराले गरेको फैसला उल्टिएको हो। सर्वोच्च अदालतका प्रवक्ता विमल पौडेलका अनुसार जन्मकैदको सजायलाई ८ वर्ष ६ महिनामा घटाउने राय बदर भएको हो। अब उनले थप साढे ११ वर्ष कैद बस्नु पर्नेछ। 

प्रधानन्यायाधीश राणा र न्यायाधीश तेजबहादुर केसीको इजलासले कोइरालाको जन्मकैदलाई घटाएर ८ वर्ष कायम गरिदिएको थियो। त्यसैले कोइराला ०७७ साउन ७ गते नै जेलबाट रिहा भएका थिए।

कोइरालाले आफू डीआईजी हुँदा श्रीमती गीता ढकालको हत्या गरेको ठहर गर्दै जिल्ला अदालत काठमाडौं र उच्च अदालत पाटनले सर्वश्वसहित जन्मकैदको सजाय सुनाएको थियो। तर जबरा र केसीको इजलासले श्रीमतीले पैसा माग्दा विवाद उत्पन्न भएपछि कोइरालाले रिसको आवेगमा आई उनलाई धकेल्दा मृत्यु भएको देखिन आएको भन्दै उनको सजाय घटाइदिएको थियो।